భర్త హైదరాబాదులో.. భార్య విజయవాడలో.. మనస్తాపంతో ఆత్మహత్య
భర్త వేధింపులు, వైవాహిక జీవితంలో ఒడిదుడుకులు, తాను పనిచేస్తున్న కంపెనీలో సమస్యల కారణంగా ఓ యువతి ఆత్మహత్య చేసుకుంది. విజయవాడ భవానీపురం హౌసింగ్ బోర్డు కాలనీకి చెందిన బండారు సౌజన్య నగరంలోని మధునగర్ కెనరా బ్యాంక్ బ్రాంచ్‌లో పనిచేస్తోంది. ఆమెకు నెల్లూరు జిల్లా ఉలవపాడుకు చెందిన వెంకటేశ్వర్లుతో నవంబర్ 2021లో వివాహం జరిగింది.
వెంకటేశ్వర్లు హైదరాబాద్‌లోని ఓ ప్రైవేట్ కంపెనీలో హెచ్‌ఆర్ మేనేజర్‌గా పనిచేస్తున్నారు. సికింద్రాబాద్ పరిధిలోని జవహర్ నగర్ పోలీస్ స్టేషన్ పరిధిలోని అప్రల్ స్టైల్ గార్డెన్‌లోని ఓ ఫ్లాట్‌లో వెంకటేశ్వర్లు ఒంటరిగా నివసిస్తున్నాడు.
సౌజన్య తన తల్లిదండ్రులతో కలిసి విజయవాడలో ఉంటోంది. పెళ్లయ్యాక వారాంతాల్లో భర్త వద్దకు వచ్చేది. పెళ్లయిన రెండేళ్ల తర్వాత భార్యాభర్తలు వేర్వేరు ప్రాంతాల్లో పనిచేస్తున్నారు.
వివాహ సమయంలో కర్ణాటకలోని విజయపురలో పనిచేస్తున్న సౌజన్య హైదరాబాద్‌కు బదిలీ కావాలనుకున్నారు. బ్యాంకు యాజమాన్యం విజయవాడకు బదిలీ అయింది. గత కొన్నేళ్లుగా హైదరాబాద్‌కు బదిలీ చేయాలని సౌజన్య చేస్తున్న విజ్ఞప్తిని బ్యాంక్ యాజమాన్యం పట్టించుకోవడం లేదు.
ఇటీవల జరిగిన బదిలీల్లో స్పౌజ్ గ్రౌండ్‌లో భర్తతో కలిసి ఉండేందుకు అనుమతించాలని కోరినప్పటికీ ఆమెకు బదిలీ రాలేదు. పెళ్లయిన తర్వాత భర్త దూరంగా ఉండడంతో మానసికంగా కుంగిపోయింది. దీనికి తోడు భర్త వేధింపులు కూడా ఎక్కువయ్యాయి.
వైవాహిక జీవితం ఇక సంతోషంగా లేకపోవడంతో విడాకులు తీసుకోవాలని భావించింది కానీ, వృద్ధులైన తల్లిదండ్రులను నొప్పించకూడదనుకుంది. జీవితంలో ఆనందం లేకపోవడం, భర్తతో సఖ్యత లేకపోవడం వంటి కారణాలతో ఆమె తరచూ మనస్తాపానికి గురైంది.
లీవులు పెట్టి భర్తతో వున్న రోజులు కూడా కష్టంగా మారాయి. దీంతో మంగళవారం రాత్రి ఇదే విషయమై ఇద్దరి మధ్య గొడవ జరిగింది. అర్ధరాత్రి దాటిన తర్వాత ఆమె ఆత్మహత్య చేసుకుంది. మృతురాలు రాసిన సూసైడ్ నోట్‌ను పోలీసులు స్వాధీనం చేసుకున్నారు.
