ఒత్తిడికి దివ్యౌషధం.. ఏంటో తెలుసా?
ప్రస్తుత పోటీ ప్రపంచంలో మనిషి జీవనం యాంత్రికం అయిపోయింది. ఈ యాంత్రిక జీవితంలో వయసు, పేద, ధనిక, ఆడ, మగ తేడా లేకుండా ప్రతి ఒక్కరికీ ఒత్తిడి పెరిగిపోతోంది. ఈ ఒత్తిడి ప్రభావం ఆరోగ్యం మీద పడుతోంది. ఈ దశలో ఒత్తిడిని వీలైనంత వరకు తగ్గించుకోవడం చాలా ముఖ్యం. ఒత్తిడిని తగ్గించే చిట్కాలేమిటో తెలుసుకుని వాటిని ఆచరిస్తే సరిపోతుంది... ఆ చిట్కాలు మీకోసం..
* ఒత్తిడిని తగ్గించడంలో దివ్య ఔషధంగా పని చేసేది నవ్వు. ప్రతి ఒక్కరూ హాయిగా నవ్వితే 80శాతం ఒత్తిడి మటుమాయమైపోతుంది. అంతేకాదు, నవ్వడం వల్ల ఒత్తిడిని కలిగించే కార్టిసాల్‌ అనే రసాయనాల ఉత్పత్తి తగ్గి, ఆనందాన్ని రేకెత్తించే ఎండోమార్ఫిన్స్‌ అనే రసాయనాలు వెలువడతాయి.
* పెద్ద పెద్ద శబ్దాలు వినడం వల్ల ఒత్తిడి అధికం అవుతుంది. కాబట్టి వీలైనంత వరకు అటువంటి శబ్దాలకు దూరంగా ఉండాలి.
* ప్రకృతిలోని పక్షుల కిలకిలారావాలు, శ్రావ్యమైన సంగీతం వినడం, నీటి ప్రవాహం, సముద్ర కెరటాలను చూస్తూ ఉండటం వంటివి చేయడం వల్ల ఒత్తిడిని జయించవచ్చు.
* మనస్సులో ఎటువంటి ఆలోచనలు రానీయకుండా అన్నీ పక్కనపెట్టి శ్వాసమీద ధ్యాస ఉంచి ధ్యానం చేయడం, వేకువజామునే వాకింగ్ చేయడం ద్వారా మానసిక దృఢత్వాన్ని పొందవచ్చు.
* క్రమం తప్పకుండా వ్యాయామం చేయడం వల్ల కూడా శారీరకంగానే కాకుండా మానసికంగా కూడా ఎంతో లాభం చేకూరుతుంది, వ్యాయామం చేయడం వల్ల సమస్యలు వచ్చినప్పుడు కృంగి పోకుండా వాటిని ఎదుర్కొనేందుకు కావాల్సిన మానసిక స్థైర్యం వస్తుంది.
* కండరాలు, శరీర అవయవాలు బిగదీసి ఉండకుండా ఫ్రీగా ఉండేట్టు చూసుకోవాలి. ఈ చిన్ని చిన్న చిట్కాలు పాటిస్తే ఒత్తిడి లేకుండా మనసు ఆహ్లాదంగా మారుతుంది.
