నాన్నమ్మ జ్ఞాపకార్థం రూ.1.25 కోట్లు ఖర్చు పెట్టిన విందు ఇచ్చిన బెగ్గర్ ఫ్యామిలీ.. ఎక్కడ?
చనిపోయిన తమ నాన్నమ్మ జ్ఞాపకార్థం పాకిస్థాన్‌కు చెందిన బెగ్గర్ ఫ్యామిలీ ఆ దేశ కరెన్సీ ప్రకారం రూ.1.25 కోట్లు ఖర్చు చేసి 20 వేల మందికి విందు భోజనం ఏర్ాటు చేశారు. పైగా, ఈ కార్యక్రమానికి వచ్చిన అతిథులకు 2 వేల వాహనాలను కూడా ఏర్పాటు చేశారు. ఈ బిచ్చగాడి కుటుంబం పాకిస్థాన్ దేశంలోని గుజ్రన్‌వాలాలో ఉంది. గుజ్రాన్వాలాలోని రాహవలి రైల్వే స్టేషన్ సమీపంలో ఇటీవల ఈ విందును ఏర్పాటు చేశారు. ఇందుకు సంబంధించిన వీడియోలు నెట్టింట వైరల్‌గా మారాయి. బిచ్చగాడు కోట్లాది రూపాయలు ఖర్చు చేసి విందు ఏర్పాటు చేయడం అందర్నీ ఆశ్చర్యానికి గురి చేస్తోంది.
పంజాబ్ ప్రావిన్స్‌లోని ఈ ప్రాంతంలో ఇటీవల బిచ్చగాడి నానమ్మ చనిపోయింది. 40వ రోజు ఆమె జ్ఞాపకార్థం భారీ విందును ఏర్పాటు చేశారు. ఈ విందుకు తమకు తెలిసిన వారందరినీ ఆహ్వానించారు. పంజాబ్ ప్రావిన్స్‌లోని పలు ప్రాంతాల నుంచి వేలాదిమంది వచ్చారు. మరో ఆసక్తికర అంశం ఏమంటే అతిథులను వేదిక వద్దకు తరలించేందుకు దాదాపు 2 వేల వాహనాలను ఏర్పాటుచేశారు. ఈ విందులో వారి సంప్రదాయ వంటకాలైన సిరి పాయా, మురబ్బాలతో పాటు మాంసాహారం ఉండేలా చూసుకున్నారు. మటన్, స్వీట్ రైస్ కూడా పెట్టారు. ఈ విందు కోసం 250 మేకలను వధించినట్లుగా స్థానిక మీడియా కథనాల సమాచారం.
