కాటేసిన పామును కొరికి చంపేసి.. హ్యాపీగా నిద్రపోయాడు.. చివరికి ఏమైందంటే?
కాటేసిన పాముని వెంటాడి వేటాడి పట్టుకున్నాడు. కసితీరా దాన్ని కొరికి కొరికి చంపేసి తన ప్రతీకారం తీర్చుకున్నాడు. పాము అయితే చనిపోయింది కానీ, చివరికి ఆ వ్యక్తి కూడా ప్రాణాలు కోల్పోవడం దురదృష్టకరం. బీహార్‌ రాష్ట్రం నలంద జిల్లాలో ఈ ఘటన జరిగింది.
మాధోపూర్‌ గ్రామానికి చెందిన 65ఏళ్ల రామా మహతోని శనివారం రాత్రి ఒక పాము కాటేసింది. దాంతో కోపంతో ఊగిపోయిన మహతో ఆ పాముని వెంటాడి పట్టుకున్నాడు. కసిదీరా కొరికి కొరికి దాన్ని చంపేశాడు. ఇంటిపక్కనే ఉన్న చెట్టుపై వేలాడదీశాడు.
మహతో పాముని కొరికి కొరికి చంపడం గమనించి కొందరు గ్రామస్తులు షాక్ తిన్నారు. అలా చేయొద్దని అతడిని వారించారు. అయినా మహతో అస్సలు వినలేదు. తన పని తాను చేశాడు. ఆ తర్వాత, కనీసం ఆసుపత్రికి వెళ్లి చికిత్స చేయించుకోమని గ్రామస్తులు బతిమిలానా పట్టించుకోలేదు. 'పాముని చంపేశాను కదా.. నాకేం కాదులే' అని చెప్పి వారి హెచ్చరికలు పెడచెవిన పెట్టాడు.
ఆ తర్వాత భోజనం చేసి నిద్రకు ఉపక్రమించాడు. తెల్లవారుజామున కుటుంబసభ్యులు చూడగా మహతో స్పృహ తప్పి పడి పోయి ఉన్నాడు. వెంటనే కుటుంబ సభ్యులు ఆసుపత్రికి తీసుకెళ్లారు. అయితే, మహతో అప్పటికే చనిపోయాడని డాక్టర్లు చెప్పారు.
