లైంగికంగా వేధించారు.. అందుకే రాజీనామా చేశా : పుదుచ్చేరి మాజీ మంత్రి చంద్రప్రియాంక

తనను కులపరంగా, లైంగికంగా వేధించారని అందుకే తన మంత్రి పదవికి రాజీనామా చేసినట్టు పుదుచ్చేరి మంత్రి వర్గంలో ఏకైక మహిళా మంత్రిగా ఉంటూ ఇటీవల తన పదవికి రాజీనామా చేసిన చంద్రప్రియాంక సంచలన ఆరోపణలు చేశారు.

తాను మంత్రి పదవికి రాజీనామా చేయడానికి గల కారణాలను ఆమె తాజాగా వెల్లడించారు. లైంగిక వేధింపులకు గురైనందుకే తాను మంత్రి పదవికి రాజీనామా చేసినట్టు తెలిపారు. ఎన్.ఆర్.కాంగ్రెస్ పార్టీకి చెందిన ఆమె ముఖ్యమంత్రి ఎన్.రంగాస్వామికి అత్యంత సన్నిహితురాలు. పైగా, పుదుచ్చేరి రాష్ట్రంలో నాలుగు దశబ్దాల తర్వాత ఓ మహిళకు మంత్రివర్గంలో చోటుదక్కింది. అలాంటి మహిళా మంత్రి రాజీనామా చేయడం ఇపుడు చర్చనీయాంశంగా మారింది. 

దీనిపై ఆమె స్పందిస్తూ, అణగారిన వర్గానికి చెందిన నేను కలపరంగా, లైంగికంగా వేధింపులకు గురయ్యాను. కొన్ని ఆధిపత్య శక్తులకు వ్యతిరేకంగా పోరాడుతూ మంత్రిగా కొనసాగలేను. పైగా, గ్రూపు, కక్ష రాజకీయాల్లో ఇమడలేక బయటకు వచ్చేశాను అని చంద్రప్రియాంక రాసిన లేఖలో పేర్కొన్నారు. అయితే, ఓ మహిళా మంత్రిని ఇబ్బంది పెట్టింది ఎవరన్న విషయంపై ఇపుడు సర్వత్రా చర్చసాగుతుంది.