శనివారం, 13 ఏప్రియల్ 2024
  1. వార్తలు
  2. తెలుగు వార్తలు
  3. తెలంగాణ వార్తలు
Written By సెల్వి
Last Updated : బుధవారం, 6 డిశెంబరు 2023 (17:30 IST)

తెలంగాణలో భారీ వర్షాలు.. గోడకూలి దంపతుల మృతి

Rains
బంగాళాఖాతంలో ఏర్పడిన తీవ్ర వాయుగుండం మైచాంగ్ ప్రభావంతో తెలంగాణ రాష్ట్రంలోని కొన్ని ప్రాంతాల్లో భారీ వర్షం కురుస్తుండడంతో బుధవారం ఖమ్మం జిల్లాలో గోడ కూలి దంపతులు మరణించారు. తుపాను మంగళవారం పొరుగున ఉన్న ఆంధ్రప్రదేశ్‌లో తీరం దాటింది.
 
ఖమ్మం జిల్లా నేలకొండపల్లి మండలం చెరువు మాదారం గ్రామంలో దంపతులు ప్రాణాలు కోల్పోయారు. మంగళవారం నుంచి ఎడతెరిపి లేకుండా కురుస్తున్న వర్షం కారణంగా ఓ ఇంటి గోడ కూలిపోయిందని అధికారులు తెలిపారు. మృతులను పుల్లయ్య (45), లక్ష్మి (38)గా గుర్తించారు. ఇదే జిల్లాలోని అశ్వాపురం మండలం భీమవరం గ్రామంలో భారీ వర్షం కారణంగా 40 గొర్రెలు మృతి చెందాయి.

భారీ వర్షం కారణంగా ఖమ్మం, వరంగల్ జిల్లాల్లో భారీ పంట నష్టం జరిగింది. కోతకు సిద్ధంగా ఉన్న పంటలు దెబ్బతినడంతో రైతులు తీవ్రంగా నష్టపోయారు. భారీ వర్షానికి కొన్ని మండలాల్లో వరి, పత్తి, మొక్కజొన్న, మిర్చి పంటలు దెబ్బతిన్నాయి. ఖమ్మం, వైరా, అశ్వారావుపేట, యెల్లందు, పినపాక, పాలేరు నియోజకవర్గాల్లో నష్టం వాటిల్లింది. నష్టపరిహారం అందించి ప్రభుత్వం ఆదుకోవాలని బాధిత రైతులు కోరారు.