కళాతపస్విని మెప్పించిన 'సర్వం తాళమయం'
శంకరాభరణం, సాగర సంగమం, స్వాతి కిరణం వంటి అద్భుత సంగీత భరిత చిత్రాలను అందించిన కళాతపస్వి కె. విశ్వనాథ్, రాజీవ్ మీనన్ ఇటీవల రూపొందించిన చిత్రం ‘సర్వం తాళ మయం’పై ప్రశంసలు కురిపించారు. ఈ చిత్ర ప్రత్యేక ప్రదర్శనను చూసిన ఆయన ‘చాలా కాలం తర్వాత ఒక గొప్ప సంగీత భరిత చిత్రాన్ని చూసాను. రాజీవ్ మీనన్ ఈ చిత్రాన్ని చాలా బాగా తీసారు. ఆద్యంతం హృదయాన్ని హత్తుకునే భావోద్వేగాలతో ఈ చిత్రాన్ని రూపొందించి, ఒక మంచి సందేశాన్ని కూడా అందించిన రాజీవ్ మీనన్‌కి నా ఆశీర్వాదాలు’ అని అభినందిస్తూ ఆప్యాయంగా కౌగిలించుకున్నారు.
ఈ చిత్రాన్ని చూసిన ప్రముఖులలో ప్రముఖ దర్శకులు చంద్రశేఖర్ యేలేటి, మహానటి దర్శకులు నాగ అశ్విన్, యాత్ర దర్శకులు మహి వీ రాఘవ్ మొదలైనవారు రాజీవ్ మీనన్‌కు శుభాకాంక్షలు తెలియజేసారు. ఏఆర్‌ రెహమాన్‌ సంగీత సారధ్యంలో రూపొందిన ఈ సినిమా మార్చి 8న తెలుగు రాష్ట్రాలు రెండింటిలోనూ విడుదలవుతోంది. జీవీ ప్రకాష్, అపర్ణ బాలమురళి హీరో హీరోయిన్లుగా నటించిన ఈ చిత్రంలో నడుముడి వేణు, వినీత్, దివ్య దర్శిని ఇతర ముఖ్య పాత్రలు పోషించారు.
