రోడ్డు ప్రమాదంలో 'దసరా' మూవీ విలన్ తండ్రి దుర్మరణం
తమిళనాడు రాష్ట్రంలోని ధర్మపురి జిల్లాలో ఘోర రోడ్డు ప్రమాదం సంభవించింది. ఈ ప్రమాదంలో తెలుగు చిత్రం 'దసరా'లో ప్రతినాయకుడుగా నటించిన షైన్ టామ్ చాకో తండ్రి సీపీ చాకో దుర్మరణం పాలయ్యారు. షైన్ టామ్ చాకో, ఆయన తల్లి మాత్రం ప్రాణాలతో బయటపడ్డారు. ప్రస్తుతం వీరిద్దరూ ఆస్పత్రి చికిత్స పొందుతున్నారు.
శుక్రవారం జరిగిన వివరాలను పరిశీలిస్తే, తెల్లవారుజామున షైన్ టాన్ చాకో తన కుటుంబ సభ్యులతో కలిసి కారులో ప్రయాణిస్తున్నారు. ఆయన తల్లిదండ్రులు, సోదరుడు, డ్రైవర్‌తో కలిసి వారు ప్రయాణిస్తుండగా ధర్మపురి సమీపంలోని సేలం - బెంగుళూరు రహదారిపై వారి వాహనం ప్రమాదానికి గురైంది. వారు ప్రయాణిస్తున్న కారు అదుపు తప్పి ముందు వైపు వెళుతున్న ఒక లారీని వెనుక నుంచి బలంగా ఢీకొట్టింది.
ఈ ప్రమాద తీవ్రత చాలా తీవ్రంగా జరిగినట్టు ప్రత్యక్ష సాక్షులు తెలిపారు. ప్రమాదం జరిగిన వెంటనే కారులో ఉన్న ఐదుగురిని చికిత్స నిమిత్తం సమీపంలోని ఆస్పత్రికి తరలించారు. అయితే, తీవ్ర గాయాలపైన సీపీ చాకో చికిత్స పొందుతూ మృతి చెందినట్టు వైద్యులు ధృవీకరించారు.
ఈ ఘటనపై స్థానిక పోలీసులు కేసు నమోదు చేసి ప్రయాదానికి గల ఖచ్చితమైన కారణాలపై దర్యాప్తు చేస్తున్నారు. ఈ దురదృష్టకర సంఘటన గురించి తెలిసిన మలయాళ చిత్ర పరిశ్రమ ప్రముఖులు, అభిమానులు తీవ్ర దిగ్బ్రాంతిని వ్యక్తం చేస్తూ, షైన టామ్ చాకో కుటుంబానికి తమ ప్రగాఢ సానుభూతిని తెలియజేస్తున్నారు.
