వెండితెర విలన్ సోను సూద్ రియల్ హీరోగా మారి కోట్లాది మంది ప్రజలతో శభాష అనిపించుకున్నారు. ముఖ్యంగా, కరోనా లాక్డౌన్ సమయంలో ప్రభుత్వం సైతం చేయలేని సాయాన్ని ఆయన చేసి ప్రతి ఒక్కరి గుండెల్లో రియల్ హీరో, దేవుడుగా మిగిలిపోయాడు. అయితే, ఈయన రాజకీయ ప్రవేశంపై గత కొంతకాలంగా వార్తలు వస్తున్నాయి. ముఖ్యంగా, కాంగ్రెస్ లేదా ఆప్ పార్టీల్లో చేరబోతున్నట్టు వార్తలు వచ్చాయి. అయితే, ఈ వార్తలపై ఆయన ఎన్నడూ స్పందించలేదు. కానీ, తాజాగా ఇచ్చిన ఓ ఇంటర్వ్యూలో క్లారిటీ ఇచ్చారు. మరో ఐదేళ్ళ తర్వాత తాను రాజకీయాల్లోకి వస్తానని చెప్పారు. ఇప్పుడు సామాజిక సేవలో నిమగ్నమై ఉన్నందున కొంత సమయం పడుతుందని సోనూసూద్ ఒక ఇంటర్వ్యూలో పేర్కొన్నారు. తన సోదరి మాళవిక ఎన్నికపై సోనూ సూద్ స్పందిస్తూ, తమ కుటుంబం మోగా నియోజకవర్గంతో చాలా కాలంగా నిమగ్నమై ఉందని, తన తల్లి నిరుపేదలకు విద్యను అందించిందని, తన కుటుంబం ఈ ప్రాంతంలో అనేక విద్యా సౌకర్యాలను ఏర్పాటు చేసిందని సోనూ సూద్ గుర్తుచేశారు. కాగా,సోనూ సూద్ సోదరి పంజాబ్లో కాంగ్రెస్ తరపున ఎన్నికలకు పోటీ చేస్తుండగా, ఆమె తరపున సోనూ ప్రచారంలో చేస్తున్నారు.
