మీటూ కేసులో తనుశ్రీ దత్తాకు షాక్.. నానాకు క్లీన్ చిట్.. ఆధారాల్లేవట..
దేశాన్ని కుదిపేసిన మీటూ కేసులో తనుశ్రీ దత్తాకు మాత్రం ఊహించ‌ని షాక్ త‌గిలింది. మీటూ ఉద్య‌మానికి ముందుగా ఆజ్యం పోసిన హీరోయిన్ తనుశ్రీ దత్తా. నానా పటేకర్ లాంటి లెజెండ‌రీ యాక్ట‌ర్ మీద లైంగిక ఆరోప‌ణ‌లు చేసింది. దీంతో నానా ప‌టేక‌ర్‌పై కేసు కూడా న‌మోదైంది.
పదేళ్ల క్రితం 'హార్న్‌ ఓకే ప్లీజ్‌' సెట్స్‌లో త‌న‌ను నానా పటేకర్ లైంగికంగా వేధించాడ‌ని తనుశ్రీ దత్తా ఆరోపించింది. ఈమె త‌ర్వాత చాలా మంది ఇలాంటి కామెంట్స్ చేసారు. అయితే ఇప్పుడు నానా పటేకర్ తప్పు చేసాడ‌ని చెప్ప‌డానికి ఎలాంటి సాక్ష్యాలు లేవ‌ని కోర్టు తేల్చేసింది.
దాంతో ఇన్నాళ్లు కోర్టులో నానిన ఈ కేసు నుంచి ఇప్పుడు విముక్తి పొందాడు నానా పటేకర్. కోర్ట్ ఈయ‌న‌కు క్లీన్ చిట్ ఇచ్చింది. ఇప్ప‌టికీ తనుశ్రీ దత్తా కావాల‌నుకుంటే ప్రొటెస్ట్‌ రిపోర్ట్‌ను దాఖలు చేయొచ్చ‌ని.. దీనివ‌ల్ల మూసేసిన కేసును కూడా మ‌రింత లోతుగా విచార‌ణ జ‌రిపించే అవ‌కాశం ఉంటుంద‌ని ఆమె త‌ర‌ఫు లాయ‌ర్ సుజయ్‌ చెప్పారు.
ఈ తీర్పుపై తనుశ్రీ దత్తా కూడా సంచ‌ల‌న ఆరోప‌ణ‌లు చేస్తున్నారు. కావాల‌నే నానా ప‌టేక‌ర్‌కు భ‌య‌ప‌డి కొంద‌రు సాక్ష్యం చెప్ప‌డానికి వెన‌కాడుతున్నారంటూ తనుశ్రీ మండిపడ్డారు.
