న్యూ ఇయర్ ఆఫర్... అమ్మాయి పుడితే రూ. 5 లక్షలు.. ఎక్కడ?

సాధారణంగా న్యూ ఇయర్ వచ్చిందంటే చాలు, ఆఫర్లు, కొనుగోళ్లతో సందడిగా ఉంటుంది. మనం ఎన్నో ఆఫర్లు చూసి ఉంటాము, కానీ ఇలాంటిదైతే ఖచ్చితంగా చూసుండము. న్యూ ఇయర్ రోజున అమ్మాయి పుడితే 5 లక్షల రూపాయలు ఇస్తారనేదే ఆ ఆఫర్. బృహత్ బెంగళూరు మహానగర పాలిక (బీబీఎంపీ) వారు బెంగుళూరు నగరంలో దాదాపు 40కి పైగా ఆసుపత్రులను నడుపుతున్నారు. 

ఈ యాజమాన్యం తమ ఆసుపత్రులలో జనవరి 1, 2019న జన్మించే ఆడపిల్లలు ఒక్కొక్కరి ఖాతాలో 5 లక్షల రూపాయిలు ఫిక్స్డ్ డిపాజిట్ చేయనున్నారు. బుధవారం నాడు మీడియా సమావేశంలో మాట్లాడుతూ మేయర్ గంగాంబికా గత ఏడాది నుంచి ఈ పథకం మొదలుపెట్టినట్లు, దీనికి పింక్ బేబీ అనే పేరు పెట్టినట్లు చెప్పారు. 

ఆడపిల్లల చదువుకు ప్రోత్సాహం అందించాలనే ఉద్దేశ్యంతో ఈ పథకాన్ని ప్రవేశపెట్టినట్లు, ఈసారి జనవరి 2వ తేదీ పుట్టే ఆడపిల్లలకు కూడా ఈ పథకం వర్తిస్తుందని తెలిపారు. ఇలాంటి పథకం దేశం మొత్తం వస్తే బాగుంటుందని పలువురు అభిప్రాయపడుతున్నారు. మరి మన తెలుగు రాష్ట్రాల్లో ఇలాంటి న్యూ ఇయర్ గిఫ్టులు ఏమయినా ఇస్తే బాగుండు.