బర్గర్‌ను ఆర్డర్ చేస్తే.. కెచప్ ప్యాకెట్లు వచ్చాయి.. కారణం తెలిస్తే..?
మెక్ డొనాల్డ్‌లో బర్గర్‌ను ఆర్డర్ చేస్తే.. ఇంటికి రెండు కెచప్ ప్యాకెట్లు మాత్రమే వచ్చాయి. అంటే ఇక్కడ మెక్‌డొనాల్డ్‌ రెస్టారెంట్‌ వాళ్ల తప్పిదం అనుకుంటే మీరు బర్గర్‌లో కాలేసినట్లే. తాగిన మైకంలో సదరు మహిళ ఆర్డర్ చేసిన విధానం అర్థంకాక వాళ్లు అలా చేశారట.
ఈ వార్త ప్రస్తుతం నెట్టింట వైరల్ అవుతోంది. ఇంకా ఈ వార్త పట్ల నెటిజన్లు సదరు మహిళను కామెంట్ల ద్వారా ఆటాడుకుంటున్నారు. తాగిన మైకంలో ఆమె చేసిన బర్గర్.. జస్ట్ కెటప్ ప్యాకెట్లుగా వచ్చింది.
వివరాల్లోకి వెళితే.. కెనడాలోని టొరంటోకు చెందిన కేటీ పూలే అనే మహిళ తన భర్తతో కలిసి మద్యం సేవించింది. అనంతరం హ్యాంగోవర్‌నుంచి బయటపడేందుకు బర్గర్ ఆర్డర్ చేసింది. అయితే, ఆర్డర్ చేసేటప్పుడు ఉల్లిగడ్డలు.. ఆవాలు.. కూరగాయలు.. బన్ను, ప్యాటీ లేకుండా బర్గర్ కావాలని టైప్‌ చేసిందట.
దీంతో మెక్‌డొనాల్డ్‌ రెస్టారెంట్‌ సిబ్బంది రెండు కెచప్ ప్యాకెట్లను ప్యాక్‌ చేసి ఆమె ఇంటికి డెలివరీ చేశారు. ఆ కెచప్ ప్యాకెట్లను చూసి కేటీ పూలేకు తాగింది దిగిపోయిందట. కెచప్ ప్యాకెట్ల ఫొటో.. తన భార్య ఆర్డర్ మెసేజ్‌ను పూలే భర్త సోషల్ మీడియా పెట్టగా వైరల్ అవుతోంది. చాలామంది ఫన్నీ కామెంట్లు పెడుతున్నారు. ఈ ఘటన జరిగి చాలా రోజులైనా సోషల్ మీడియాలో ఈ వార్త వైరల్ అవుతోంది.
