పెళ్లయిన ప్రేమోన్మాది... పెట్రోల్ పోసి యువతిని పట్టుకున్నాడు...
ప్రేమించలేదంటూ ఓ యువతిపై ఇంటికి వెళ్లి మరీ పెట్రోల్‌తో తనతో పాటు ఆమెకు కూడా నిప్పంటించాడు ఇబ్రహీం అనే కీచకుడు. ఈ దాడిలో అజీనా బేగం అనే యువతితో పాటు ఆమె వదిన కూడా తీవ్ర గాయాలు పాలయ్యింది. 90 శాతం గాయాలతో చావుబ్రతుకుల మధ్య కొట్టుమిట్టాడుతున్నారు ఆ మహిళలు.
వివరాల్లోకి వెళితే... బెహేరేన్‌కు చెందిన ఇబ్రహీం గత కొన్నేళ్ళుగా గల్ఫ్ కంట్రీలో ఉద్యోగం చేస్తున్నాడు. అయితే అతనికి పెళ్లై ఇద్దరు పిల్లలు కూడా ఉన్నారు. ఆరు నెలల క్రితం టపచాపుత్రకి చెందిన అజీనా బేగం అనే ఓ యువతితో ఫేస్ బుక్‌లో పరిచయం అయింది. అయితే కొద్దిరోజుల క్రితం ఇండియా వచ్చిన ఇబ్రహీం ఆమెను కలవడానికి ప్రయత్నించాడు కానీ ఆ యువతి నిరాకరించింది.
అంతేకాదు ఆ యువతి నీకు పెళ్లయింది నాకు ఇంట్లో సంబంధాలు చూస్తున్నారు... అంటూ అతన్ని పట్టించుకోలేదు.దీంతో రాక్షసుడిలా మారిన ఇబ్రహీం ఈ రోజు ఉదయం పెట్రోల్ క్యాన్‌తో ఆ యువతి ఇంటికి వెళ్లి ఆమెపై పెట్రోల్ పోసాడు. అతడు కూడా తనపై పెట్రోల్ పోసుకుని అంటించుకున్నాడు. తనకు నిప్పంటించుకుని వెళ్లి ఆమెను పట్టుకున్నాడు. దానితో ఆ మంటలు ఆమెను కూడా చుట్టుముట్టాయి.
ఆమెను కాపాడేందుకు ప్రయత్నించిన ఆమె వదినకి కూడా మంటలు అంటుకుని తీవ్ర గాయాలు పాలయ్యారు. ఈ ఘటనలో ఇద్దరు మహిళలకు 90 శాతం గాయాలయ్యాయి. ప్రస్తుతం ఉస్మానియాలో చికిత్స పొందుతున్నారు. కానీ ఈ ఘటనలో ఇబ్రహీంకి 40 శాతం గాయాలయ్యాయి.
ఈ ఘటనతో ఒక్కసరిగా ఉలిక్కిపడ్డారు ఆ కాలనీ వాసులు. గ్యాస్ సిలిండర్ పేలిందని అనుకున్నారు. కానీ ఆ తర్వాత అసలు సంగతి తెలిసింది. ఘటన స్థలానికి చేరుకున్న పోలీసులు వాళ్ళని ఆస్పత్రికి తరించారు. పెట్రోల్ కావడంతో ఇల్లు కూడా పూర్తిగా దగ్ధం అయింది.
