రాయల్ వశిష్ట బోటు వెలికితీత.. గుర్తుపట్టలేని విధంగా శవాలు
తూర్పు గోదావరి జిల్లా దేవీపట్నం మండలం కచ్చులూరు మందం వద్ద గోదావరిలో మునిగిపోయిన రాయల్ వశిష్ట బోటును ఎట్టకేలకు మంగళవారం వెలికితీశారు. ఈ ఆపరేషన్‌‌ను ధర్మాడి సత్యం బృందం సక్సెస్ చేసింది. బోటును సత్యం టీమ్ నీళ్లపైకి తెచ్చింది. నీటి అడుగుభాగం నుంచి రోప్‌ల సాయంతో వెలికితీశారు. ఫలితంగా బోటు మునిగిన 38 రోజుల తర్వాత రాయల్ వశిష్ట పూర్తిగా ధ్వంసమైన స్థితిలో గట్టుకు తీసుకొచ్చారు.
వశిష్ట బోటు పూర్తిగా ధ్వంసం కావడంతో విడిభాగాలను బయటకు తీసుకొచ్చేందుకు ప్రయత్నిస్తున్నట్లు సమాచారం. బోటు బయటకు తీస్తుండగా అందులో నుంచి దుర్వాసన వస్తోంది. బోటులో ఉన్న మృతదేహాలు కుళ్లిపోవడం వల్లే దుర్వాసన వస్తోందని అధికారులు చెబుతున్నారు. కాగా సెప్టెంబర్ 15న కచ్చులూరు వద్ద గోదావరిలో బోటు మునిగిన సంగతి తెలిసిందే. ఈ ప్రమాదంలో 39 మంది మృతి చెందగా, 26 మంది సురక్షితంగా బయటపడ్డారు. ఇంకా 12 మంది ఆచూకీ లభించలేదు.
