ఐసీసీ టెస్ట్ ర్యాంకులు : మళ్లీ అగ్రస్థానానికి చేరుకున్న భారత్
అంతర్జాతీయ క్రికెట్ మండలి ఐసీసీ టెస్టు ర్యాంకులను తాజాగా ప్రకటించింది. ఇందులో భారత క్రికెట్ జట్టు మళ్లీ మొదటి స్థానానికి చేరుకుంది. స్వదేశంలో పర్యాటక ఇంగ్లండ్ జట్టుతో జరిగిన ఐదు టెస్ట్ మ్యాచ్‌‍ల సిరీస్‌ను భారత్ 4-1 తేడాతో కైవసం చేసుకుంది. దీంతో టీమిండియా మళ్లీ అగ్రస్థానానికి ఎగబాకింది. నిన్నటిదాకా మొదటి స్థానంలో ఉన్న ఆస్ట్రేలియా క్రికెట్ జట్టు ఇపుడు రెండో స్థానానికి పడిపోయింది. ఐసీసీ విడుదల చేసిన తాజా ర్యాంకింగ్స్ ప్రకారం...
భారత్, ఆస్ట్రేలియా జట్లు మొదటి రెండు స్థానాల్లో ఉండగా, ఆ తర్వాతి స్థానాల్లో వరుసగా ఇంగ్లండ్ (3), న్యూజిలాండ్ (4), సౌతాఫ్రికా (5), పాకిస్థాన్ (6), వెస్టిండీస్ (7), శ్రీలంక (8), బంగ్లాదేశ్ (9), జింబాబ్వే (10), ఐర్లాండ్ (11), ఆప్ఘనిస్థాన్ (12) జట్లు ఉన్నాయి. ఐర్లాండ్ ఒక స్థానం మెరుగుపరుచుకుని 11వ ర్యాంకుకు చేరుకోగా, ఆప్ఘనిస్థాన్ ఒక స్థానం కోల్పోయి 12వ ర్యాంకుకు చేరుకుంది. అలాగే, భారత క్రికెట్ జట్టు ఐసీసీ నిర్వహించే వన్డే, టీ20, టెస్ట్ ఫార్మెట్‌లలో మొదటి స్థానంలో నిలిచింది.
సరిగా ఆడలేకపోతున్నానని భావించినపుడు వైదొలుగుతా : రోహిత్ శర్మ
క్రికెట్ మైదానంలో‌నా శక్తి మేరకు రాణించలేకపోతున్నానని భావించినపుడు జట్టు నుంచే కాదు.. అంతర్జాతీయ క్రికెట్ నుంచి వైదొలుగుతానని భారత క్రికెట్ జట్టు కెప్టెన్ రోహిత్ శర్మ అన్నారు. రోహిత్ శర్మ క్రికెట్ శకం ముగిసిందని ఇటీవల ఇంగ్లండ్ మాజీ కెప్టెన్ జెఫ్రీ బాయ్‌కాట్ చేసిన వ్యాఖ్యలను రోహిత్ శర్మ వద్ద ప్రస్తావించగా ఆయన స్పందించారు. తన ఆట బాగాలేదని అనిపించిన రోజున వెంటనే ఆట నుంచి తప్పుకుంటానని చెప్పారు. తనలో ఆట ఇంకా మిగిలి ఉందని స్పష్టం చేశాడు.
'నేను సరిగ్గా ఆడటం లేదని భావించినప్పుడు ఈ విషయాన్ని టీమ్ మేనేజ్‌మెంట్‌కు చెప్పి రిటైర్ అవుతా. కానీ నిజాయతీగా చెప్పాలంటే గత రెండు, మూడు ఏళ్లుగా నా ఆట మరింత మెరుగైంది. అత్యుత్తమ ఆట తీరును కనబరుస్తున్నా. నేను గణాంకాలు, రికార్డుల గురించి పెద్దగా పట్టించుకునే వ్యక్తిని కాదు. భారీ స్కోరులు చేయడం ముఖ్యమేకానీ జట్టు అవసరాలకు తగ్గట్టు ఆడటంపై దృష్టిపెట్టాను. నేను జట్టులో కొంత మార్పు తీసుకురావాలనుకున్నాను. ఆటగాళ్లు చాలా స్వేచ్ఛగా ఆడటం మీరు చూస్తున్నారు. వ్యక్తిగత స్కోర్లు ముఖ్యం కాదు. నిర్భయంగా, మనసును ప్రశాంతంగా ఉంచుకుని ఆడితే పరుగులు వాటంతట అవే వస్తాయి' అని రోహిత్ శర్మ చెప్పాడు.
