శుక్రవారం, 21 జూన్ 2024
  1. వార్తలు
  2. తెలుగు వార్తలు
  3. క్రైం న్యూస్
Written By వరుణ్
Last Updated : సోమవారం, 29 ఏప్రియల్ 2024 (12:59 IST)

ప్రియురాలి గొంతు కోసేందుకు యత్నించిన ప్రియుడికి 16 యేళ్ళ జైలు!!

jail
తన ప్రియురాలిని గొంతు కోసి హత్య చేసేందుకు ప్రయత్నించిన ప్రియుడికి 16 యేళ్ళ జైలుశిక్ష పడింది. ఈ దారుణ ఘటన రెండేళ్ల క్రితం లండన్‌లో జరిగింది. ఈ దారుణానికి పాల్పడింది కూడా హైదరాబాద్ నగరానికి చెందిన యువకుడే. హత్యాయత్నానికి ముందు నిందితుడు క్షణాల్లో ఎలా చంపాలో గూగుల్‌లో శోధించి తెలుసుకున్నట్ట పోలీసులకు ఇచ్చిన వాంగ్మూలంలో పేర్కొన్నారు. 
 
కోర్టు వివరాల ప్రకారం, హైదరాబాద్ నగరానికి చెందిన శ్రీరామ్ అంబర్లకు, 2017లో కాలేజీలో చదువుతుండగా బాధితురాలు సోనా బిజుతో పరిచయం ఏర్పడింది. ఆ తర్వాత ఇద్దరూ డేటింగ్ ప్రారంభించారు. అయితే, శ్రీరామ్ వేధింపులు తాళలేక సోనా అతడితో బంధాన్ని తెంచేసుకుంది. కానీ, అతడు మాత్రం ఆమె వెంటపడుతూ వేధించసాగాడు. పలు మార్లు ఆమె ఇంటికి వెళ్లి తనను పెళ్లి చేసుకోవాలంటూ బ్లాక్ మెయిల్ చేశాడు. 
 
ఇదిలావుంటే, 2022లో ఇద్దరూ పైచదువుల కోసం యూకే వెళ్లారు. అక్కడ సోనా లండన్‌లోని ఈస్ట్ హామ్ అనే ప్రాంతంలోని రెస్టారెంట్లో పనికి కుదురుకుంది. కానీ శ్రీరామ్ మాత్రం సోనాను వేధించడం ఆపలేదు. సోనాతో మాట్లాడేందుకు తరచూ ఆమె రెస్టారెంట్‌కు ఫోన్ చేసేవాడు. సోనాతో మాట్లాడాలని కోరేవాడు. ఆమెతో మాట్లాడాలనే ఉద్దేశంతో తరచూ ఆ రెస్టారెంట్‌కు వెళ్లి ఫుడ్ ఆర్డర్ చేస్తుండేవాడు.
 
ఇక ఘటన జరిగిన రోజు కూడా శ్రీరామ్ ఆ రెస్టారెంట్‌కు వెళ్లి ఫుడ్ ఆర్డరిచ్చారు. కానీ ఆమె మాత్రం ఇతర కస్టమర్లతో వ్యవహరించినట్టే అతడితో వ్యవహరించింది. ఈలోపు ఫోనులో ఏదో చూసి శ్రీరామ్ ఆమెను మళ్లీ బెదిరించాడు. తనను పెళ్లి చేసుకోకపోతే చంపేస్తానన్నాడు. కానీ, ఆమె పెళ్లికి అంగీకరించకపోవడంతో కత్తి తీసుకుని ఆమె గొంతు కోసేశాడు. ఏకంగా తొమ్మిది సార్లు ఒంటిపై పొడిచాడు. తీవ్ర గాయాలతో ఆసుపత్రి పాలైన ఆమె కోలుకునేందుకు ఏకంగా నెల రోజులు పట్టింది. హత్యాయత్నానికి మునుపు నిందితుడు గూగుల్లో పలు అంశాలు సెర్చ్ చేశాడు. 'క్షణాల్లో హత్య ఎలా చేయాలి', ‘లండన్‌లో విదేశీయుడు హత్య చేస్తే ఏమవుతుంది?', 'కత్తితో చంపడం ఎలా?” అని ఆన్లైన్లో వెతికినట్టు దర్యాప్తులో తేలింది.