పొగ.... ఎప్పుడు మానేసినా మంచిదే!

చాలాకాలంగా పొగతాగే అలవాటు గలవారిని దాన్ని వదలమంటే.. 'ఆ.. ఏం మానేస్తాం? ఇప్పుడు ఆపేస్తే మాత్రం ఏం ప్రయోజనం?' అని సాకులు చెబుతుంటారు. నిజానికి పొగ మానేసిన సమయం నుంచే క్యాన్సర్ ముప్పు తగ్గటమూ మొదలవుతుంది తెలుసా? పక్షవాతం, గుండె, ఊపిరితిత్తి జబ్బుల ముప్ప

చాలాకాలంగా పొగతాగే అలవాటు గలవారిని దాన్ని వదలమంటే.. 'ఆ.. ఏం మానేస్తాం? ఇప్పుడు ఆపేస్తే మాత్రం ఏం ప్రయోజనం?' అని సాకులు చెబుతుంటారు. నిజానికి పొగ మానేసిన సమయం నుంచే క్యాన్సర్ ముప్పు తగ్గటమూ మొదలవుతుంది తెలుసా? పక్షవాతం, గుండె, ఊపిరితిత్తి జబ్బుల ముప్పులూ తగ్గుముఖం పడతాయి. పొగ మానటం వల్ల ఇవే కాదు. మరిన్ని లాభాలు కూడా ఉన్నాయని నిపుణులు వివరిస్తున్నారు.

• శరీరం మరింత శక్తిని పుంజుకుంటుంది. శ్వాస తీసుకోవటం తేలికవుతుంది. వ్యాయామం, పనులు చేసేటప్పుడు ఊపిరితిత్తుల పనితీరు మెరుగుపడుతుంది. 

• రుచి, వాసన మునుపటి కన్నా బాగుంటాయి. అందువల్ల ఆకలి పెరిగి మంచి పోషకాహారం తీసుకోవటానికి బీజం వేస్తుంది. వేళ్ల మీద ఏర్పడిన మచ్చలు తగ్గటం మొదలవుతుంది. 

• దుస్తులు, జుట్టు, శ్వాస పొగ వాసన కొట్టవు. ఇది ఇతరులతో సత్సంబంధాలు ఏర్పరచుకోవటానికి దోహదం చేస్తుంది. 

• చర్మం కూడా కొత్త ఆరోగ్యంతో నిగనిగలాడుతుంది. దంతాల ఆరోగ్యమూ మెరుగవుతుంది. 

• పొగ మానేయగానే లోలోన ఎంతో హాయిగా ఉన్నామన్న భావన కలుగుతుంది.