గ్రామీణ మహిళలకు ఆరోగ్యం.. పోషణ ఆరోగ్య జాతర.. ఎప్పుడంటే?
గ్రామీణ మహిళలకు ఆరోగ్యం, పరిశుభ్రత, పౌష్టికాహారంపై అవగాహన కల్పించేందుకు మహిళా శిశు సంక్షేమ శాఖ "పోషణ ఆరోగ్య జాతర" కార్యక్రమాన్ని చేపట్టింది. మండల కేంద్రాల్లో సమావేశాలు నిర్వహించడంతో పాటు మంచి ఆరోగ్యం, పరిసరాలను పరిశుభ్రంగా ఉంచుకోవడం, పౌష్టికాహారం తీసుకోవడం వల్ల కలిగే ప్రయోజనాల గురించి మహిళలకు అవగాహన కల్పిస్తారు.
మహిళా శిశు సంక్షేమ శాఖ, వైద్య, ఆరోగ్య, ఐకేపీ, పంచాయత్ రాజ్ శాఖల సమన్వయంతో ఈ కార్యక్రమాన్ని అమలు చేస్తుంది. యునిసెఫ్ సహకారంతో చేపట్టనున్న పోషణ ఆరోగ్య జాతరను ప్రయోగాత్మకంగా కరీంనగర్‌లో అమలు చేసి విజయవంతమైతే ఇతర ప్రాంతాలకు విస్తరిస్తామన్నారు.
ఆగస్టు 22న మానకొండూరు మండల కేంద్రంలోని అంగన్‌వాడీ కేంద్రంలో ఈ కార్యక్రమాన్ని ప్రారంభించనున్నారు. కార్యక్రమం ప్రారంభ ఏర్పాట్లను పరిశీలించిన కలెక్టర్ పమేలా సత్పతి అధికారులతో సమీక్షా సమావేశం నిర్వహించారు.
అన్ని మండల కేంద్రాల్లో మహిళలు, చిన్నారులు, గర్భిణులతో సమావేశాలు నిర్వహించనున్నట్లు ఆమె తెలిపారు. గర్భిణులు, చిన్నారులకు వ్యాక్సిన్‌లు వేయించారా లేదా అనే విషయాన్ని ఆరోగ్య శాఖ అధికారులు పరిశీలిస్తారు.
రక్తహీనత రోగులను గుర్తించడంతో పాటు, సీజనల్ వ్యాధులు, గర్భిణీ స్త్రీలకు అవసరమైన పరీక్షలు, నులిపురుగుల నిర్మూలన, ఇతర వాటి గురించి పాల్గొనేవారికి అవగాహన కల్పిస్తారు. పాల్గొనేవారికి వైద్య పరీక్షలు నిర్వహించి చికిత్స అందించడానికి వైద్య శిబిరం కూడా నిర్వహిస్తారు. ఆశా వర్కర్లు, సూపర్‌వైజర్లు స్టాల్స్‌ను ఏర్పాటు చేసి పాల్గొనేవారికి అవగాహన కల్పిస్తారు.
