ఖమ్మ జిల్లాలో రక్తమోడిన రహదారులు... ఆరుగురు దుర్మరణం
తెలంగాణ రాష్ట్రంలోని ఉమ్మడి ఖమ్మం జిల్లాలో రహదారులు రక్తమోడాయి. రెండు ప్రాంతాల్లో జరిగిన రోడ్డు ప్రమాదాల్లో ఆరుగురు దుర్మరణం పాలయ్యారు. ఈ రెండు ప్రమాదాలకు లారీలే కారణం కావడం గమనార్హం. జిల్లాలోని కొణిజర్ల వద్ద ఓ లారీని కారు ఢీకొట్టింది. ఈ ప్రమాదంలో ముగ్గురు వ్యక్తులు అక్కడికక్కడే ప్రాణాలు కోల్పోయారు. మరొకరు పరిస్థితి విషమంగా ఉంది. మృతులు వైరా మండలం విప్పలమడక వాసులుగా గుర్తించారు.
మృతులను పారుపల్లి రాజేశ్, సుజాత దంపతులు, వీరి కుమారుడు అశ్విత్ (13)గా గుర్తించారు. హైదరాబాద్ నగంరోలని ఓ ప్రైవేట్ ఫార్మసీ కంపెనీలో పనిచేస్తున్న రాజేశ్.. వైరా మండలంలోని స్వగ్రామానికి వెళుతుండగా ఈ ప్రమాదం జరిగింది. మరికాసేపట్లో ఇంటికి చేరుతామనగా వారిని మృత్యువు కాటేసింది. దీంతో విప్పలమడకలో విషాద చాయలు అలముకున్నాయి.
మరో ఘటనలో జిల్లాలోని పెనుబల్లి వీఎం బంజరలో జరిగింది. బంజర సమీపంలో రెండు లారీలు ఒకదానికొకటి ఎదురెదురుగా ఢీకొన్నాయి. ఈ ప్రమాదంలో రెండు లారీల క్యాబిన్లు నుజ్జునుజ్జు అయ్యాయి. ఈ ప్రమాదంలో రెండు లారీల డ్రైవర్లు చనిపోయారు. మూడో ఘటన కల్లూరు మండలం రంగంబంజరంలో జరిగింది. ఆటోను ఒక లారీ ఢీకొట్టింది. ఈ ఘటనలో సాయితేజ అనే యువకుడు ప్రాణాలు కోల్పోగా, మరో ముగ్గురికి తీవ్ర గాయాలయ్యాయి. ఈ మూడు ప్రమాదాలపై స్థానకి పోలీసులు కేసు నమోదు చేసి విచారణ జరుపుతున్నారు.
