కేరళ విద్యార్థికి ఫేస్ బుక్ నజరానా... ఎందుకో తెలుసా?

ప్రపంచ ప్రఖ్యాత సోషల్ మీడియా దిగ్గజం ఫేస్‌బుక్ ఒక భారతీయ విద్యార్థి తెలివి తేటలకు మెచ్చి అతడిని సత్కరించనుంది. కేరళ రాష్ట్రం అళపుజకు చెందిన 19 ఏళ్ళ విద్యార్థి కేఎస్ అనంతకృష్ణకు ఫేస్‌బుక్ ధన్యవాదాలు తెలిపింది. వాట్సాప్‌లో వినియోగదారుకి తెలియకుండానే వారి ఫైళ్లను, ఇతర సమాచారాన్ని పూర్తిగా తొలగించే ఓ బగ్‌ను ఈ విద్యార్థి కనుగొన్నాడు. ఇంజనీరింగ్ స్టూడెంట్ అయిన అనంతకృష్ణ ఈ బగ్ గురించి ఫేస్‌బుక్‌కి తెలియజేసాడు, అంతేకాకుండా దీనికి ఒక పరిష్కార మార్గాన్ని కూడా వివరించాడట.

అనంతకృష్ణ కనుగొన్న బగ్‌పై ఫేస్‌బుక్ దాదాపు రెండు నెలలపాటు నిశితంగా అధ్యయనం చేసి, దాన్ని గుర్తించింది. ఈ విద్యార్థి తెలివితేటలకు ఆశ్చర్యపోయి అతడిని సత్కరించాలని నిర్ణయించింది. అనంతకృష్ణకు రూ.34,000 నగదు బహుమతితో, అలాగే ప్రతిష్టాత్మక ‘హాల్ ఆఫ్ ఫేమ్‘లో ఇతనికి చోటు కల్పిస్తామని హామీ ఇచ్చింది. ఈ ఏడాది ఫేస్‌బుక్ థ్యాంక్స్ లిస్టులోని 80వ స్థానంలో అనంతకృష్ణ పేరు ఉంది. అనంతకృష్ణ కూడా ఫేస్‌బుక్‌కి కృతజ్ఞతలు తెలియజేశాడు. కేరళ ప్రభుత్వానికి సంబంధించిన సైబర్ సెల్‌లో కూడా ఈ విద్యార్థి తన వంతు సేవలందిస్తున్నాడు.