మహిళలు రాజకీయంగా ఎదగాలన్నదే సీఎం కేసీఆర్ కోరిక : మంత్రి సబిత

మహిళలు రాజకీయంగా ఎదగాలన్నదే ముఖ్యమంత్రి కేసీఆర్ కోరిక అని తెలంగాణ రాష్ట్ర మంత్రి సబితా ఇంద్రా రెడ్డి అన్నారు. ఈ నెల 8వ తేదీ అంతర్జాతీయ మహిళా దినోత్సవం. దీన్ని పురస్కరించుకుని తెలంగాణాలో మూడు రోజుల పాటు మహిళా దినోత్సవ వేడుకలు నిర్వహిస్తున్నారు. 

ఇందులో ఆమె పాల్గొని మాట్లాడుతూ, మహిళలు రాజకీయంగా ఎదగాలని సీఎం కేసీఆర్ ఎపుడూ కోరుకుంటారన్నారు. నామినేటెడ్ పోస్టులు మహిళలకు కేటాయించి ప్రత్యేక రిజర్వేషన్లు కల్పించారన్నారు. అలాగే, కేసీఆర్ సీఎం అయిన తర్వాత సమాజంలో మార్పు కోసం ప్రయత్నం చేస్తున్నారన్నారు. గతంలో వేసవి వస్తే నీళ్ల కోసం మహిళలు అనేక ఇబ్బందులు ఎదుర్కొన్నారని గుర్తుచేశారు. కానీ ఇపుడు ఇంటి వద్దే 24 గంటలు నీళ్లు వస్తున్నాయన్నారు. 

కేసీఆర్ ప్రభుత్వం కాలంలో షీ టీమ్స్ ఏర్పాటు చేశారని, పోలీస్ శాఖలో మహిళకు 33 శాతం రిజర్వేషన్లు కల్పించారని, ఎన్ఆర్ఐ వేధింబపులను అరికట్టేందుకు ప్రత్యేక ఎన్.ఆర్.ఐ విభాగాన్ని ఏర్పాటు చేశారని, మహిళలకు ఆర్థిక భద్రత కోసం వడ్డీ లేకుండా రుణాలను తెరాస ప్రభుత్వం ఇస్తుందని మంత్రి సబితా ఇంద్రారెడ్డి తెలిపారు.