మరో రీమేక్ చేయబోతున్న వెంకీ మామ??
సంక్రాంతికి విడుదలైన 'ఎఫ్‌2' సినిమాతో ఈ ఏడాదిని సక్సెస్‌ఫుల్‌గా ప్రారంభించిన సీనియ‌ర్ హీరో వెంక‌టేష్ ఘ‌న‌విజ‌యాన్ని అందుకున్నారు. 'గురు' సినిమా చేసిన త‌ర్వాత చాలా కాలం గ్యాప్ తీసుకున్న విక్టరీ వెంక‌టేష్ స‌రైన స్క్రిప్ట్‌ని ఎంచుకుని, దానికి త‌నదైన అద్భుత‌మైన కామెడీ టైమింగ్‌తో తెలుగు ప్రేక్ష‌కుల‌ను ఉర్రూత‌లూగించారనడంలో ఎటువంటి సందేహం లేదు. కాగా... ఆయన ప్రస్తుతం తన మేన‌ల్లుడు నాగ‌చైతన్య‌తో క‌లిసి 'వెంకీ మామ' సినిమా చేస్తున్నారు.
కాగా... ఈ సినిమా త‌ర్వాత వెంకీ తన పాత పంథాలోనే ఓ హిందీ సినిమాని రీమేక్ చేయాల‌నే ఆలోచ‌న‌లో ఉన్న‌ారట. ఈ మేరకు అజ‌య్‌దేవ‌గ‌ణ్ హీరోగా నటించి, ఇటీవల విడుదలైన 'దే దే ప్యార్ దే' సినిమాలోని అజ‌య్‌దేవ‌గ‌ణ్ పాత్ర వెంకీకి చాలా న‌చ్చింద‌ట. విడాకులు తీసుకున్న 50 ఏళ్ల హీరో తన వ‌య‌సులో సగం వయసు ఉన్న అమ్మాయితో ప్రేమ‌లో ప‌డే ఆ క్యారెక్ట‌ర్ త‌న‌కు స‌రిగ్గా స‌రిపోతుందని వెంకీ భావిస్తున్నట్లు సమాచారం. మరి వెంకీ ఈ సినిమాని ఏ రేంజ్‌లో చేయబోతున్నారో... చూడాల్సిందే...
