ఆ తిలకం ఇంకా మెరుస్తూనే ఉంది.. వరద బాధితుల కోసం రూ.కోటి విరాళం : బాలకృష్ణ

యాభై యేళ్ల క్రితం మా నాన్న స్వర్గీయ ఎన్.టి.రామారావు నా నుదుటిన దిద్దిన తిలకం ఇంకా మెరుస్తూనే ఉందని హీరో నందమూరి బాలకృష్ణ అన్నారు. ఆయన తన 50 యేళ్ల సినీ నటప్రస్థానంపై స్పందిస్తూ, 50 ఏళ్ల నుంచి నా నట ప్రస్థానం సాగుతూనే ఉంది. వెలుగుతూనే ఉందన్నారు. 

తెలుగు భాష ఆశీస్సులతో, తెలుగుజాతి అభిమాన నీరాజనాలతో పెనవేసుకున్న బంధం ఇది.. ఈ ఋణం తీరనిదన్నారు. ఈ జన్మ మీ కోసం.. మీ ఆనందం కోసం. నా ఈ ప్రయాణంలో సహకరించిన అందరికీ కృతజ్ఞతలు తెలియజేసుకుంటున్నట్టు పేర్కొన్నారు. 

ప్రస్తుతం తెలుగు నేలను వరద ముంచెత్తుతోంది. ఈ విపత్కర పరిస్థితులలో బాధాతప్త హృదయంతో ఆంధ్ర ప్రదేశ్ ముఖ్యమంత్రి సహాయ నిధికి రూ.50 లక్షలు, తెలంగాణ ముఖ్యమంత్రి సహాయ నిధికి రూ.50 లక్షలు నా బాధ్యతగా బాధిత ప్రజల సహాయార్థం విరాళంగా అందిస్తున్నాను. రెండు రాష్ట్రాలలో మళ్ళీ అతి త్వరలోనే సాధారణ పరిస్థితులు నెలకొనాలని ఆ భగవంతుడిని ప్రార్థిస్తున్నాను అంటూ ఆయన పేర్కొన్నారు.