వైసీపీ ఎమ్మెల్సీ దువ్వాడ శ్రీనివాస్ ఓవరాక్షన్.. భార్యకూతుళ్లపై దాడి (వీడియో)
వైసీపీ ఎమ్మెల్సీ దువ్వాడ శ్రీనివాస్ ఇంటి వద్ద ఉద్రిక్తత నెలకొంది. దువ్వాడ శ్రీను ఇంట్లోకి ఆయన భార్య వాణి, కుమార్తెలు వెళ్లడంతో పరిస్థితి తారుమారైంది. వాణి, శ్రీనుల మధ్య వాగ్వాదం జరిగింది. దీంతో మాటలు హద్దులు మీరి దాడులకు దారితీసింది.
పెద్ద కుమార్తె హైందవి‌తో కలిసి దువ్వాడ శ్రీనివాస్ నూతనంగా నిర్మించిన ఇంటికి ఆయన సతీమణి దువ్వాడ వాణి వచ్చారు. ఇంటి గేట్లను బలవంతంగా తెరిచి వాణి, హైందవిలు లోనికి ప్రవేశించారు. బయట నుంచి వచ్చిన శ్రీనివాస్ ఒక్క సారిగా భార్యాకూతురిని చూసి చిందులు తొక్కారు.
భార్యా కూతురిని చంపేస్తాను అంటూ గ్రానైట్ రాయి పట్టుకుని వారిపైకి దూసుకెళ్లారు. పోలీసులు ఆయనను అదుపు చేశారు. ఈ సందర్భంగా వాణి మాట్లాడుతూ.. తన భర్త వివాహేతర సంబంధం కారణంగా తమ కుటుంబం పరువు పోతోందని ఆమె ఆవేదన వ్యక్తం చేశారు.
సుదీర్ఘ రాజకీయ చరిత్ర కలిగిన కుటుంబం నుంచి వచ్చిన తాను.. తన భర్త నిర్వాకంతో తీవ్ర మనోవేదనకు గురవుతున్నానని తెలిపారు. తన భవిష్యత్తు ఎలా ఉన్నా పర్వాలేదని, తన కుమార్తెల భవిష్యత్తు కోసం ఆలోచిస్తే ఆందోళన కలుగుతోందని కన్నీటిపర్యంతమయ్యారు.
తన భర్తపై పార్టీ అధిష్ఠానం చర్యలు తీసుకోవాలని వాణి కోరారు. ఇకపోతే.. దువ్వాడ భార్యాపిల్లలపై దాడికి ప్రయత్నించిన వీడియోలు సోషల్ మీడియాలో వైరల్ అవుతున్నాయి.
