బిల్లు నువ్వే కట్టావుగా... షూస్‌ కూడా నువ్వే వెయ్యి.. భార్య కాళ్లకు చెప్పులు తొడిగిన ధోనీ
భారత క్రికెట్ జట్టు మాజీ కెప్టెన్ మహేంద్ర సింగ్ ధోనీ తన భార్య సాక్షి ధోనీతో కలిసి షాపింగ్‌లో నిమగ్నమయ్యాడు. ఈ క్రమంలో ఆయన తన భార్యకు చెప్పులు తొడుగుతూ కెమెరా కంటికి చిక్కాడు. అంతే.. దీనికి సంబంధించిన ఫోటో ఒకటి ఇపుడు సోషల్ మీడియాలో వైరల్ అయింది. ఈ వివరాలను పరిశీలిస్తే,
ఓ చెప్పుల దుకాణానికి వెళ్లిన ఈ జంట, చెప్పులను పరీక్షించుకునే క్రమంలో ఇబ్బంది పడుతున్న సాక్షికి ధోనీ సహకరించాడు. కూర్చుని, ఆమె కాళ్లకు అవి సరిపోయాయో లేదో స్వయంగా చూస్తూ కాళ్లకు తొడిగాడు. అతనే స్వయంగా చెప్పుల బెల్టులు సర్దాడు. ఈ ఫోటోలను తన ఇన్ స్టాగ్రామ్ ఖాతాలో పోస్టు చేసిన సాక్షి, "బిల్లు నువ్వే కట్టావుగా... షూస్‌ కూడా నువ్వే వెయ్యి" అని కామెంట్‌ చేసింది.
షాపులో అందరి ముందూ బేషజాలు లేకుండా, మోకాళ్ళపై కూర్చొని తన భార్యకు ధోనీ చేసిన సాయాన్ని చూసిన నెటిజన్లు ప్రశంసల వర్షం కురిపిస్తున్నారు. కాగా, వచ్చే సంవత్సరం ఆస్ట్రేలియాతో జరిగే వన్డే సిరీస్‌కు ఎంపికైతే ఆస్ట్రేలియా వెళ్లి, జనవరి 12న జరిగే మ్యాచ్‌లో ధోనీ ఆడనున్నాడు.
