సోషల్ మీడియా సెల్ఫీ క్వీన్.. సెల్ఫీ తీసుకుంటూనే ప్రాణాలు కోల్పోయింది...
సోషల్ మీడియా సెల్ఫీ క్వీన్‌గా పేరుగాంచి తైవాన్ దేశానికి చెందిన గిగి వూ చివరకు సెల్ఫీ తీసుకుంటూనే ప్రాణాలు కోల్పోయింది. ఈనెల 19వ తేదీన జరిగిన ఈ ప్రమాద వార్త వివరాలను పరిశీలిస్తే, తైవాన్ దేశంలోని న్యూ తైపీ నగరానికి చెందిన గిగి వూ అనే యువతికి ఎత్తైన ప్రదేశాల నుంచి సెల్ఫీలు తీసి వాటిని సోషల్ మీడియాలో పోస్ట్ చేయడమంటే మహా సరదా.
అలా... తైవాన్‌లోని యుషాన్ నేషనల్ పార్కు‌లోని ఎత్తైన పర్వతంపై అంచున నిలబడి సెల్ఫీ తీసుకుంటున్న సమయంలో ప్రమాదవశాత్తుజారి వంద అడుగుల లోతులో పడిపోయింది. దీంతో ఆమె కదల్లేని స్థితిలో అక్కడే చిక్కుకుపోయింది. అయితే తాను ప్రమాదంలో చిక్కుకున్న విషయాన్ని మాత్రం శాటిలైట్ ఫోన్ ద్వారా తన స్నేహితులకు గిగి వూ చేరవేసింది.
ఆ వెంటనే రంగంలోకి దిగిన తైవాన్ రెస్క్యూ బృందాలు ఆమెను రక్షించేందుకు ప్రయత్నించారు. అయితే, వాతావరణం సరిగా లేకపోవడంతో హెలికాఫ్టర్లు ఆ ప్రాంతానికి చేరుకోలేక పోయాయి. ఫలితంగా సెల్ఫీ క్వీన్ ప్రాణాలు విడిచింది. వాతావరణం అనుకూలించిన తర్వాత మృతదేహం కోసం గాలిస్తామని రెస్క్యూ బృందాలు తెలిపాయి.
