సంజు శాంసన్‌కు రూ.24లక్షల జరిమానా.. ఎందుకంటే?
గుజరాత్ టైటాన్స్ చేతిలో ఓటమి తర్వాత రాజస్థాన్ రాయల్స్ కెప్టెన్ సంజు శాంసన్‌కు భారత క్రికెట్ నియంత్రణ మండలి (బీసీసీఐ) నుంచి పెద్ద ఎదురుదెబ్బ తగిలింది. బుధవారం రాత్రి జరిగిన ఈ మ్యాచ్‌లో రాజస్థాన్ 58 పరుగుల తేడాతో ఓడిపోయింది. ఆట సమయంలో స్లో ఓవర్ రేట్ కారణంగా, సంజు శాంసన్‌‌పై రూ.24 లక్షల జరిమానా విధించింది.
ఈ సీజన్‌లో రాజస్థాన్ రాయల్స్ స్లో ఓవర్ రేట్ కారణంగా జరిమానా విధించబడటం ఇది రెండోసారి. గతంలో, చెన్నై సూపర్ కింగ్స్‌తో జరిగిన మ్యాచ్‌లో ఇదే ఉల్లంఘనకు స్టాండ్-ఇన్ కెప్టెన్ రియాన్ పరాగ్‌కు రూ.12 లక్షల జరిమానా విధించబడింది.
ఇటీవల గుజరాత్‌తో జరిగిన మ్యాచ్‌లో, మిగిలిన జట్టు సభ్యులకు కూడా బీసీసీఐ జరిమానా విధించింది. ప్రతి ఆటగాడికి వారి మ్యాచ్ ఫీజులో 25 శాతం లేదా రూ.6 లక్షలు, ఏది తక్కువైతే అది జరిమానాగా విధించారు. మ్యాచ్ సమయంలో జట్టు అన్ని అంశాలలోనూ పేలవ ప్రదర్శన చేసిందని సంజు శాంసన్ అంగీకరించాడు.
