అంత పని ఎలా చేశావ్ శంకరనారాయణన్... కారును అవలీలగా లాగిపడేస్తే ఎలా?
కేరళ నదిలో ఇరుక్కుకునిపోయిన ఫార్చ్యునర్ కారును ఓ ఏనుగు అవలీలగా లాగిపడేసింది. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అవుతోంది. ఆ ఏనుగు పేరు తిరువెంగప్పుర శంకరనారాయణన్. రెండు టన్నులకు పైగా బరువున్న ఫార్చ్యూనర్ కారును శంకరనారాయణన్ సునాయాంగా లాగి గట్టుకు చేర్చింది. ఈ వివరాలను పరిశీలిస్తే,
ఓ తెల్లటి టయోటా ఫార్చ్యూనర్ వాహనం నదిలో కొంత భాగం మునిగిపోయి, ముందు ఎడమ చక్రం మాత్రమే పైకి కనిపిస్తుండటాన్ని ఇన్‌స్టాగ్రామ్‌లో వైరల్ అవుతున్న వీడియోలో చూడొచ్చు. పరిస్థితి చేయిదాటిపోయిందని అనిపించిన సమయంలో, ఓ మావటి తన ఏనుగు తిరువెంగప్పుర శంకరనారాయణన్‌తో కలిసి అక్కడకు చేరుకున్నాడు.
ఆ తర్వాత, దాదాపు రెండున్నర టన్నులకు పైగా బరువున్న ఆ భారీ వాహనాన్ని శంకరనారాయణన్ అనే ఆ ఏనుగు కేవలం కొన్ని నిమిషాల వ్యవధిలోనే విజయవంతంగా నీటిలోంచి బయటకు లాగింది. టయోటా ఫార్చ్యూనర్ వాహనం పూర్తి బరువు (గ్రాస్ వెహికల్ వెయిట్) సుమారు 2,735 కిలోల వరకు ఉంటుందని, దీనితో ఏనుగు చేసిన ఈ పని మరింత ప్రశంసనీయమని తెలుస్తోంది.
ఈ వీడియోను ఇన్‌స్టాగ్రామ్‌లో షేర్ చేస్తూ, 'తిరువెంగప్పుర శంకరనారాయణన్... మా చిన్న ఏనుగు...' అనే వ్యాఖ్యను జతచేశారు. భారతీయ సంస్కృతిలో ఏనుగులకు శతాబ్దాలుగా ప్రత్యేక స్థానం ఉంది. వాటి జ్ఞానం, బలం, విశ్వాసాలకు ప్రతీకగా వాటిని పూజిస్తారు. అనేక భారతీయ రాజవంశాలలో కూడా ఏనుగులు కీలక పాత్ర పోషించాయి. ప్రస్తుతం వైరల్ అవుతున్న ఈ వీడియో, వాటి సామర్థ్యాలకు ఒక చక్కని ఉదాహరణగా నిలుస్తోంది.
