బులంద్షర్ జిల్లాలో విషాదం... సిలిండర్ పేలి ఐదుగురి దుర్మరణం
ఉత్తరప్రదేశ్ రాష్ట్రంలోని బులంద్షర్ జిల్లాలో విషాదం చోటుచేసుకుంది. వంటగ్యాస్ సిలిండర్ పేలిపోవడంతో ఐదుగురు ప్రాణాలు కోల్పోయారు. ఈ ఘటన బులంద్షర్ జిల్లాలోని సికింద్రాబాద్ ప్రాంతంలో జరిగింది. ఈ ప్రమాదంలో మరో ముగ్గురు గాయపడినట్టు పోలీసులు తెలిపారు.
ఈ ప్రమాదంపై బులంద్‌షహర్ జిల్లా మేజిస్ట్రేట్ చంద్ర ప్రకాష్ సింగ్ మాట్లాడుతూ, షట్టరింగ్ పనిలో నిమగ్నమైన రియాజుద్దీన్ ఇంట్లో సోమవారం సాయంత్రం ఈ సంఘటన జరిగిందని, అందులో సుమారు 19 మంది నివసిస్తున్నారు. "సికింద్రాబాద్‌లోని ఆశాపురి కాలనీలో రాత్రి 8.30 నుండి 9.00 గంటల మధ్య సిలిండర్ పేలుడు సంభవించింది, దీనితో ఇల్లు మొత్తం కూలిపోయింది" అని వెల్లడించారు. ఈ ఘటనలో గాయపడిన ముగ్గురిలో ఒకరి పరిస్థితి విషమంగా ఉందని వెల్లడించారు.
మీరట్ జోన్, అదనపు డైరెక్టర్ జనరల్ ఆఫ్ పోలీస్, ధ్రువ కాంత్ ఠాకూర్ మాట్లాడుతూ, ఐదుగురు మరణించిన వారి గురించి ఇప్పటివరకు సమాచారం అందిందని, ఇంకా కొంతమంది శిథిలాల కింద చిక్కుకున్నారని చెప్పారు. వీరి కోసం రెస్క్యూ ఆపరేషన్ ఇంకా కొనసాగుతోందని సీనియర్ పోలీసు వెల్లడించారు. అలాగే, ఈ ఘటనలో ఐదుగురు మరణించినట్లు బులంద్‌షహర్ చీఫ్ మెడికల్ ఆఫీసర్ ధృవీకరించగా, 10 మంది సురక్షితంగా ఉన్నారని తెలిపారు.
అయితే, ఏ రకమైన సిలిండర్ పేలిపోయిందో వివరించాలని జిల్లా మేజిస్ట్రేట్‌ని కోరగా, విచారణ అనంతరం స్పష్టత వస్తుందని చెప్పారు. ఎన్‌డిఆర్‌ఎఫ్ సిబ్బంది, అగ్నిమాపక దళం, పోలీసులు, వైద్య, స్థానిక యంత్రాంగం సహాయక చర్యల్లో పాల్గొన్నట్లు తెలిపారు. "ముఖ్యమంత్రి యోగి ఆదిత్యనాథ్ ఈ సంఘటన వివరాలను సంబంధిత అధికారుల ద్వారా తెలుసుకున్నారు. సహాయక చర్యలు వేగవంతం చేయాలని, క్షతగాత్రులకు మెరుగైన వైద్యం అందేలా చూడాలని అధికారులను ఆదేశించారు.
మృతదేహాలను పోస్టుమార్టం నిమిత్తం తరలించినట్లు బులంద్‌షహర్ సీనియర్ సూపరింటెండెంట్ ఆఫ్ పోలీస్ శ్లోక్ కుమార్ తెలిపారు. శిథిలాల కింద ఎవ్వరూ చిక్కుకోలేదని బతికి ఉన్న కుటుంబ సభ్యులు చెబుతున్నప్పటికీ, రెస్క్యూ టీమ్‌లు తమ పనిని కొనసాగిస్తూ అన్ని జాగ్రత్తలు తీసుకుంటున్నాయని ఆయన తెలిపారు.
