17న నింగిలోకి సీఎంఎస్‌-01 ప్రయోగం.. ఇస్రో ప్రకటన
సీఎంఎస్‌-01ను ఈ నెల 17న నింగిలోకి పంపనున్నట్టు భారత అంతరిక్ష పరిశోధనా సంస్థ ఇస్రో ప్రకటించింది. భారతదేశపు 42 వ కమ్యూనికేషన్‌ ఉపగ్రహమైన దీనిని శ్రీహరికోటలోని సతీశ్‌ధావన్‌ స్పేస్‌ సెంటర్‌ రెండో ప్రయోగవేదిక నుంచి పీఎస్‌ఎల్వీ-సి50 ద్వారా దీనిని ప్రయోగించనున్నారు. వాతావరణం అనుకూలిస్తే డిసెంబర్‌ 17 న మధ్యాహ్నం 3.41 గంటలకు ఈ ప్రయోగాన్ని నిర్వహించనున్నట్టు అధికారులు తెలిపారు.
ఫ్రీక్వెన్సీ స్ప్రెక్టంలో విస్తరించిన సి బ్యాండ్‌ సేవలను అందించేందుకే ఈ ప్రయోగం చేపడుతున్నామని, అండమాన్‌, నికోబార్‌ దీవులు, లక్షద్వీప్‌లకు కూడా దీని పరిమితి విస్తరించనుందని అధికారులు వివరించారు. ఇది షార్‌ నుంచి జరుగుతున్న 77వ ప్రయోగం కావడం గమనార్హం. సిఎంఎస్‌ భారతదేశపు 42 వ కమ్యూనికేషన్‌ ఉపగ్రహం. పిఎస్‌ఎల్‌వి - సి 50 ఎక్స్‌ఎల్‌ ఆకృతిలో 22 వది అని ఇస్రో పేర్కొంది.
