వెంకీ నమ్మకాన్ని నిలబెట్టిన ఎఫ్2.. అంతేగా...
అనిల్ రావిపూడి దర్శకత్వంలో తెరకెక్కిన చిత్రం 'ఎఫ్2'. విక్టరీ వెంకటేష్, మెగా ప్రిన్స్ వరుణ్ తేజ్‌లు కలిసి నటించిన ఈ చిత్రంలో తమన్నా, మెహ్రీన్‌లు హీరోయిన్లు. ఈ చిత్రం సంక్రాంతికి విడుదలై బంపర్ హిట్‌ అయింది. ఈ చిత్రం తొలి ఆట నుంచి కలెక్షన్ల వర్షం కురిపిస్తోంది.
ముఖ్యంగా, కథల విషయంలో వెంకటేశ్‌ను ఒప్పించడం అంత తేలికైన పనేంకాదు.. ఆయనకి ఉన్న అనుభవం అలాంటిది. కథ.. అందులో తన పాత్ర విషయంలో పూర్తి క్లారిటీ రానిదే ఆయన సెట్స్‌పైకి రారు. అలాంటి వెంకటేశ్ సరైన కథ కోసం వెయిట్ చేస్తూ కొంత గ్యాప్ తీసుకున్నారు. ఈ సమయంలోనే అనిల్ రావిపూడి 'ఎఫ్2' కథతో ఆయనను ఒప్పించారు. ఆది కాస్త వెంకటేష్ నమ్మకాన్ని నిలబెట్టింది.
విడుదలైన రోజు నుంచి ఇప్పటివరకు వసూళ్లపరంగా ఈ సినిమా తన జోరును కొనసాగిస్తూనే వుంది. ఈ సినిమా విడుదలైన ఈ 20 రోజుల్లో తెలుగు రాష్ట్రాల్లో రూ.60 కోట్లకిపైగా షేర్‌ను, ప్రపంచవ్యాప్తంగా రూ.74 కోట్లకి పైగా షేర్‌ను రాబట్టింది. ఇక, ఓవర్సీస్‌లో ఈ సినిమా ఇంతవరకూ రూ.8 కోట్లకి పైగా వసూళ్లను సాధించడం విశేషం. వెంకీ కెరియర్‌లో అత్యధిక వసూళ్లను.. లాభాలను తెచ్చిపెట్టిన చిత్రంగా 'ఎఫ్ 2'ను గురించి చెప్పుకుంటున్నారు.
