'ప్రాంతీయవాదం'తో నిండిన "మా" సభ్యత్వం నాకొద్దు : నాగబాబు
ప్రాంతీయవాదం, సంకుచిత మనస్తత్వంతో కొట్టుమిట్టాడుతున్న మూవీ ఆర్టిస్ట్ అసోసియేషన్ సభ్యత్వం తనకు వద్దని మెగా బ్రదర్ నాగబాబు ప్రకటించారు. ఈ మేరకు ఆయన తన ప్రాథమిక సభ్యత్వానికి రాజీనామా చేస్తున్నట్టు ప్రకటించారు. తన రాజీనామా లేఖను తన సిబ్బందితో 48 గంటల్లో మా కార్యాలయానికి పంపిస్తానని తెలిపారు.
ఎంతో హోరాహోరీగా సాగిన మా ఎన్నికల ఫలితాలు ఆదివారం వెలువడ్డాయి. హీరో మంచు విష్ణు 107 ఓట్ల మెజారిటీతో తన ప్రత్యర్థి ప్రకాశ్ రాజ్‌పై ఘనవిజయం సాధించారు. ప్రెసిడెంట్‌గా మంచు విష్ణు, ఎగ్జిక్యూటివ్‌ వైస్‌ ప్రెసిడెంట్‌గా శ్రీకాంత్, జనరల్‌ సెక్రటరీగా రఘుబాబు, ట్రెజరర్‌గా శివబాలాజీ గెలుపొందారు.
అయితే, ఆరంభం నుంచి ప్రకాశ్ రాజ్‌కి గట్టిగా మద్దతునిస్తూ వచ్చిన ప్ర‌కాశ్‌రాజ్ ఓడిపోవ‌డంతో మెగా బ్రదర్ సంచ‌ల‌న నిర్ణయం తీసుకున్నారు. 'ప్రాంతీయవాదం మరియు సంకుచిత మనస్తత్వంతో కొట్టు మిట్టాడుతున్న మూవీ ఆర్టిస్ట్ అసోసియేషన్‌లో కొనసాగడం ఇష్టం లేక మా అసోసియేషన్‌లో నా ప్రాథమిక సభ్యత్వానికి రాజీనామా చేస్తున్నాను సెలవు' అంటూ నాగబాబు సోషల్ మీడియా ద్వారా వెల్లడించారు.
పైగా, తన రాజీనామాను 'మా' అసోసియేషన్‌కి 48 గంటల్లో తన స్టాఫ్ ద్వారా పంపుతాను అని తెలిపారు. ఇది ఎంతో ఆలోచించి, ప్రలోభాలకు అతీతంగా పూర్తి చిత్తశుద్దితో తీసుకున్న నిర్ణయం అని అన్నారు. నాగబాబు తీసుకున్న నిర్ణయం పట్ల అభిమానులు, నెటిజన్లు ప‌లు ర‌కాలుగా స్పందిస్తున్నారు.
