ఇసుకను స్నాక్స్‌లా తినేస్తున్న వ్యక్తి.. 40 ఏళ్లుగా ఇదే తంతు!
ఈ మనిషి గురించి వింటే షాకవుతారు. ఒకటి కాదు, రెండు కాదు.. ఏకంగా 40 సంవత్సరాలుగా ఇసుక తింటున్నాడు ఒక వ్యక్తి. ఇసుకను స్నాక్స్‌లాగా ఆరగించేస్తున్నాడు.
వివరాల్లోకి వెళితే.. ఒడిశాకు చెందిన హరిలాల్ సక్సేనా గంజాం జిల్లా కీర్తిపూర్ లో భవన నిర్మాణ కూలీగా పనిచేస్తున్నాడు. అతడికి 40 ఏళ్లుగా ఇసుక తినే అలవాటుంది.
భోజనానికి ముందో లేదంటే భోజనం తరువాతో ఇసుకను తినేవాడు. అయితే, ఒకప్పుడు చాలా ఎక్కువగా తినేవాడినని, ఇప్పుడు తగ్గించేశానని హరిలాల్ చెబుతున్నాడు.
ఇసుక తిన్న తర్వాత కాస్తంత అసౌకర్యంగా అనిపించినా.. ఆ తర్వాత అంతా మామూలుగా అవుతుందని వివరించాడు. ఇప్పటిదాకా తనకు ఎలాంటి అనారోగ్య సమస్య రాలేదని చెప్పుకొచ్చాడు.
తన చిన్నప్పుడు తాముండే గ్రామానికి దగ్గర్లోనే ఓ నది ఉండేదని, రోజూ అక్కడకు వెళ్లి ఇసుకను తినేవాడినని తెలిపాడు. వర్షాకాలం వస్తే ముందుగానే ఇసుకను ఇంట్లో భారీగా నిల్వ పెట్టుకునే వాడినని వివరించాడు.
