జానీకి తప్పని కష్టాలు.. బెయిల్‌పై తీర్పు రిజర్వ్.. మళ్లీ జైలుకు..

లైంగిక వేధింపుల కేసులో అరెస్టయిన కొరియోగ్రాఫర్ షేక్ జానీ అకా జానీ మాస్టర్‌కు ఊరట లభించడం లేదు. బెయిల్‌ పిటిషన్‌పై విచారణలో మరోసారి ఆయనకు నిరాశే ఎదురైంది. జానీ మాస్టర్ బెయిల్ పిటిషన్‌పై రంగారెడ్డి పోక్సో ప్రత్యేక కోర్టు బుధవారం వాదనలు వింది. కేసును విచారించిన న్యాయస్థానం తీర్పును రిజర్వ్‌లో ఉంచింది. 

అక్టోబర్ 14న తీర్పు వెలువడనుంది. అప్పటి వరకు జానీ మాస్టర్ చంచల్‌గూడ సెంట్రల్ జైలులో రిమాండ్‌ను అనుభవించాల్సి ఉంటుంది. జానీకి అసిస్టెంట్‌గా పనిచేసిన 21 ఏళ్ల మహిళా కొరియోగ్రాఫర్, అతను చాలా సంవత్సరాలుగా తనపై లైంగిక వేధింపులకు పాల్పడుతున్నాడని ఆరోపిస్తూ అతనిపై కేసు పెట్టింది. 

మైనర్‌గా ఉన్నప్పటి నుంచి తనపై అత్యాచారం చేశాడని ఆమె ఫిర్యాదు చేయడంతో జానీపై పోక్సో కేసు నమోదు చేసి హైదరాబాద్ పోలీసులు గోవాలో అరెస్ట్ చేశారు. అనంతరం చంచల్‌గూడ జైలులో జ్యుడీషియల్‌ రిమాండ్‌ విధించారు. తాజాగా ఈ కేసులో బెస్ట్ కొరియోగ్రఫీ విభాగంలో జాతీయ అవార్డు అందుకోవాల్సిన ఆయనకు మధ్యంతర బెయిల్ వచ్చింది. అయితే, అతనిపై పోక్సో కేసు కోర్టులో పెండింగ్‌లో ఉన్నందున అతని అవార్డును సస్పెండ్ చేశారు. దీంతో జానీ మాస్టర్ మళ్లీ జైలుకు వెళ్లి రిమాండ్‌ను అనుభవించాల్సి వచ్చింది.