భారత్‌లో మరొక కొత్త ఫంగస్.. పేరు.. Nasal aspergillosis.. డయాబెటిస్ రోగులకు..?
కరోనాతో పాటు బ్లాక్, వైట్ ఫంగస్‌లు వేధిస్తుంటే.. తాజాగా వీటికి తోడు ఇప్పుడు ఒక కొత్త రకం ఫంగల్ ఇన్ఫెక్షన్ వచ్చి చేరింది. అదే నాసల్ ఆస్పెర్‌గిలోసిస్ (Nasal aspergillosis). గుజరాత్లోని వడోదరాలో తొలిసారి ఈ కొత్త ఫంగల్ ఇన్ఫెక్షన్ కేసును గుర్తించారు వైద్యులు. గోత్రి ఎస్‌ఎస్‌జి వైద్య కళాశాలకు అనుబంధంగా పనిచేసే రెండు ప్రభుత్వ ఆసుపత్రుల్లో 262 మంది రోగులు మ్యూకోర్‌మైకోసిస్‌ (బ్లాక్ ఫంగస్)కు చికిత్స పొందుతుండగా.. వారిలో 8 మందికి ఆస్పెర్‌గిలోసిస్ ఫంగస్ లక్షణాలు బయటపడ్డాయి.
ఈ కొత్త రకం ఫంగల్ ఇన్ఫెక్షన్పై కోవిడ్ -19 సలహాదారు డాక్టర్ షీటల్ మిస్త్రీ మాట్లాడుతూ, 'ఈ పల్మనరీ ఆస్పర్గిలోసిస్ అనే ఫంగల్ ఇన్ఫెక్షన్ సాధారణంగా రోగనిరోధకశక్తి తక్కువగా ఉన్న వారిలో కనిపిస్తుంది. ఆస్పర్గిలోసిస్ అనేది చాలా అరుదైన ఫంగల్ ఇన్ఫెక్షన్. ఇది కోవిడ్ నుంచి కోలుకున్న లేదా చికిత్స పొందుతున్న రోగుల్లో వచ్చే అవకాశం ఉంది.
ఆస్పెర్‌గిలోసిస్ ఇన్ఫెక్షన్ ముకోర్‌మైకోసిస్ వలె మ్యుటిలేటింగ్ ఇన్ఫెక్షన్ కానప్పటికీ, ఇది ఇన్వాసివ్ ఇన్ఫెక్షన్గా చెప్పవచ్చు. ఇప్పుడు బయటపడుతున్న ఫంగల్ ఇన్ఫెక్షన్లు రినో-ఆర్బిటల్- సెరిబ్రల్ పాసేజ్‌లోనే ఎక్కువగా ఉంటాయి. అందుకే దీన్నిఅరుదైన ఇన్ఫెక్షన్గా భావిస్తున్నాం' అని అన్నారు.
కోవిడ్ చికిత్సలో భాగంగా స్టెరాయిడ్లను మితిమీరి వినియోగిస్తున్నారు. దీనితో పాటు ఆక్సిజన్ సరఫరాను హైడ్రేట్ చేయడానికి నాన్ స్టెరైల్ వాటర్ కూడా విపరీతంగా వినియోగిస్తున్నారు. ఈ కారణంగా ఫంగల్ ఇన్ఫెక్షన్ల కేసులు పెరుగుతున్నాయని మిస్త్రీ చెబుతున్నారు.
ఈ ఫంగల్ ఇన్ఫెక్షన్లు సాధారణంగా డయాబెటిస్ ఉన్న రోగులకు, రోగ నిరోధక శక్తి తక్కువగా ఉన్న వారికి సోకే ప్రమాదం ఎక్కువగా ఉంది. రక్తంలో తక్కువ లింఫోసైట్లు (లింఫోపెనియా) ఉన్నవారిలో కూడాలో ఈ ఫంగల్ ఇన్ఫెక్షన్ల ప్రమాదం ఎక్కువని వైద్యులు చెబుతున్నారు.
అందువల్ల, ప్రారంభంలోనే దీన్ని కనుగొని చికిత్స చేయించుకోవాలని, లేదంటే ప్రాణాలకే ప్రమాదమని వైద్యులు స్పష్టం చేస్తున్నారు. అయితే, ఈ ఆస్పర్గిలోసిస్ ఫంగస్ రంగును ఇంకా వర్గీకరించలేదు. దీనిని వైట్ లేదా యెల్లో ఫంగస్గా పిలుస్తున్నాం. కానీ ఇది వేర్వేరు రంగులలో కనిపిస్తుంది. కొన్ని సందర్భాల్లో ఇది గోధుమ, నీలం-ఆకుపచ్చ, పసుపు- ఆకుపచ్చ, ఆకుపచ్చ, బూడిద రంగుల్లో కనిపిస్తుంది.
ఈ ఫంగస్లన్నింటికీ యాంఫోటెరిసిన్-బి ఉపయోగించి ఒకే విధమైన చికిత్స చేస్తారు. ఈ ఫంగస్ లక్షణాలు తక్కువగా ఉన్నప్పుడే వైద్యుడిని సంప్రదించడం మంచిది. ఆలస్యం చేస్తే ప్రాణానికే ముప్పు వాటిల్లే ప్రమాదం ఉంది.
