తన తోకను తానే మింగిన పాము.. వీడియో వైరల్
సాధారణంగా చిన్న చిన్న జలచరాలను పాములు ఆరగించడం చూస్తుంటాం. కానీ, ఓ పాము తన తోకను తానే మింగేసింది. ఈ ఆసక్తికర సంఘటన అమెరికాలోని పెన్సిల్వేనియాలో జరిగింది. దీనికి సంబంధించిన వీడియో ఒకటి ఇపుడు సోషల్ మీడియాలో వైరల్ అయింది.
అమెరికాలోని పెన్సిల్వేనియాలో సరీసృపాల అభయారణ్యం ఒకటి ఉంది. ఇక్కడ ఓ పాము తన తోకను తానే మింగుతున్న వైనాన్ని స్నేక్‌ ఎక్స్‌పర్ట్‌ అయిన జీస్సే రోథాకర్‌ కంటికి కనిపించింది. దీంతో ఆయన అప్రమత్తమై దాన్ని వీడియో తీశాడు.
పైగా, ఆ పాము నోట్లో నుంచి తోకను బయటకు తీసేందుకు సుమారు 5 నిమిషాల పాటు శ్రమించాడు. పాము తలపై నెమ్మదిగా నిమరడంతో.. అది కూడా నెమ్మదిగా తన నోట్లో నుంచి తోకను బయటకు తీసింది.
అయితే ఈ జాతికి చెందిన పాములు ఇతర జాతులకు చెందిన పాములను మింగేస్తుంటాయని జీస్సే చెప్పుకొచ్చాడు. ఈ తోక వేరే పాముదై ఉండొచ్చని తనకు తానే తెలియకుండా.. తన తోకనే మింగేసిందని చెప్పుకొచ్చాడు. ఈ వీడియో ఇపుడు సోషల్ మీడియాలో వైరల్ అయింది.
