భారతదేశం ఆహార మిగులు దేశంగా మారింది.. ప్రధాని నరేంద్ర మోదీ
భారతదేశం ఆహార మిగులు దేశంగా మారిందని, ప్రపంచ ఆహారం- పౌష్టికాహార భద్రతకు పరిష్కారాలను అందించేందుకు భారత్ కృషి చేస్తోందని ప్రధాని నరేంద్ర మోదీ అన్నారు. భారతదేశ ఆర్థిక విధానాలకు వ్యవసాయం కేంద్రబిందువుగా ఉందని, కేంద్ర బడ్జెట్ 2024-25 సుస్థిరమైన, వాతావరణాన్ని తట్టుకోగలిగే వ్యవసాయానికి పెద్దపీట వేసిందని పేర్కొన్నారు.
భారతీయ రైతులకు మద్దతుగా పూర్తి పర్యావరణ వ్యవస్థను అభివృద్ధి పరిచిందని ప్రధాన మంత్రి అన్నారు. 65 ఏళ్ల తర్వాత భారత్‌లో నిర్వహిస్తున్న 32వ అంతర్జాతీయ వ్యవసాయ ఆర్థికవేత్తల సదస్సు (ఐసీఏఈ)లో ఆయన ప్రసంగించారు.
వ్యవసాయ ఆర్థికవేత్తల గత అంతర్జాతీయ సదస్సును గుర్తుచేస్తూ, భారతదేశం కొత్తగా స్వతంత్ర దేశంగా మారిందని, ఇది దేశ వ్యవసాయం, ఆహార భద్రతకు సవాలుగా ఉండే సమయమని మోదీ పేర్కొన్నారు. ఇప్పుడు భారతదేశం ఆహార మిగులు దేశంగా ఉందని, పాలు, పప్పులు, మసాలా దినుసుల ఉత్పత్తిలో దేశం ప్రపంచంలోనే ప్రథమ స్థానంలో ఉందని ఆయన అన్నారు.
అలాగే, దేశం ఆహారధాన్యాలు, పండ్లు, కూరగాయలు, పత్తి, చక్కెర, టీలలో రెండవ అతిపెద్ద ఉత్పత్తిదారుగా అవతరించింది. దాదాపు 70 దేశాల నుంచి సుమారు 1,000 మంది ప్రతినిధులు హాజరైన ఈ సదస్సులో ఆయన మాట్లాడుతూ, "ఒకప్పుడు భారతదేశ ఆహార భద్రత ప్రపంచానికి ఆందోళన కలిగించే సమయం.
ఇప్పుడు ప్రపంచ ఆహార భద్రత, ప్రపంచ పోషకాహార భద్రతకు పరిష్కారాలను అందించడానికి భారతదేశం కృషి చేస్తోంది. అందువల్ల, ఆహార వ్యవస్థ పరివర్తనపై చర్చలకు భారతదేశ అనుభవం విలువైనదని, ప్రపంచ దక్షిణాదికి ప్రయోజనం చేకూరుస్తుందని మోదీ అన్నారు. ప్రపంచ సంక్షేమానికి భారతదేశం నిబద్ధతను 'విశ్వ బంధు'గా ప్రధాన మంత్రి పునరుద్ఘాటించారు.
