ఆపరేషన్ సింధూర్: దేశ వ్యాప్తంగా రాజకీయ నేతల హర్షం.. రాహుల్ ప్రశంసలు
పాకిస్తాన్, పాకిస్తాన్ ఆక్రమిత కాశ్మీర్ (PoK) లోని ఉగ్రవాద స్థావరాలను లక్ష్యంగా చేసుకుని భారత సాయుధ దళాలు ప్రారంభించిన ఆపరేషన్ సింధూర్ విజయవంతమైందని ప్రకటించారు. దీనిపై కాంగ్రెస్ సీనియర్ నాయకులు రాహుల్ గాంధీ, మల్లికార్జున్ ఖర్గే ప్రశంసించారు. ఆపరేషన్ సింధూర్ విజయంపై రాహుల్ గాంధీ భారత సైన్యాన్ని అభినందించారు. ఇంకా ఎక్స్‌లో ఇలా పోస్టు చేశారు. "మా సాయుధ దళాలను చూసి గర్వపడుతున్నాను. జై హింద్!" అని అన్నారు.
కాంగ్రెస్ అధ్యక్షుడు మల్లికార్జున్ ఖర్గే కూడా భారత సాయుధ దళాల పట్ల ప్రశంసలు వ్యక్తం చేశారు. ఈ సమయంలో, జాతీయ ఐక్యత, సంఘీభావం చాలా ముఖ్యమైనవి. భారత జాతీయ కాంగ్రెస్ మన సాయుధ దళాలకు అండగా నిలుస్తుంది. గతంలో మన నాయకులు మార్గాన్ని చూపించారు. జాతీయ ప్రయోజనాలే మా అత్యున్నత ప్రాధాన్యత.. అని ఖర్గే అన్నారు.
అలాగే పాకిస్తాన్‌లోని ఉగ్రవాద స్థావరాలపై భారత రక్షణ దళాలు లక్ష్యంగా దాడులు చేశాయనే నివేదికలకు ప్రతిస్పందనగా, దేశవ్యాప్తంగా అనేక మంది రాజకీయ నాయకులు ప్రశంసలను వ్యక్తం చేశారు. తెలంగాణ, ఆంధ్రప్రదేశ్ నాయకులు ఈ ఆపరేషన్‌ను ప్రశంసించారు. దీనిని భారతదేశ బలానికి నిదర్శనంగా అభివర్ణించారు. ఇటీవల పహల్గామ్‌లో జరిగిన ఉగ్రవాద దాడికి తగిన ప్రతీకారంగా కూడా ఈ దాడులను చాలా మంది భావించారు.
ఈ నేపథ్యంలో ఆల్ ఇండియా మజ్లిస్-ఎ-ఇత్తెహాదుల్-ముస్లిమీన్ (AIMIM) అధ్యక్షుడు, హైదరాబాద్ పార్లమెంటు సభ్యుడు అసదుద్దీన్ ఒవైసీ సోషల్ మీడియా ప్లాట్‌ఫామ్ ఎక్స్‌లో పోస్ట్ ద్వారా ఈ దాడులను స్వాగతించారు.
"పాకిస్తాన్‌లోని రహస్య ఉగ్రవాద స్థావరాలపై మన రక్షణ దళాలు లక్ష్యంగా చేసుకున్న దాడులను నేను స్వాగతిస్తున్నాను. పహల్గామ్ లాంటి మరో సంఘటనను నివారించడానికి పాకిస్తాన్‌కు బలమైన పాఠం నేర్పించాలి. పాకిస్తాన్ ఉగ్రవాద మౌలిక సదుపాయాలను నాశనం చేయాలి" అని అసదుద్దీన్ ఒవైసీ అన్నారు.
