నల్లగా ఉన్నాడంటూ భర్తను వేధించడం క్రూరత్వమే : కర్నాటక హైకోర్టు
నల్లగా ఉన్న భర్తను కట్టుకున్న భార్య పదేపదే అవమానించసాగింది. భార్యాభర్తల మధ్య గొడవ జరిగినపుడల్లా నల్లగా ఉన్నావంటూ వేధిస్తూ వచ్చేది. ఈ వేధింపులను భరించలేని భర్త కోర్టును ఆశ్రయించాడు. ఆ తర్వాత భర్తపై భార్య గృహ హింస చట్టం కింద కేసు పెట్టింది. దీనిపై విచారణ జరిపిన కోర్టు... ఆమె చేసిన ఆరోపణల్లో ఏమాత్రం నిజం లేదని పేర్కొంటూ విడాకులు మంజురూ చేసింది. కర్నాటక హైకోర్టు తాజాగా వెల్లడించిన ఈ తీర్పు వివరాలను పరిశీలిస్తే,
కర్నాటకకు చెందిన ఓ జంటకు గత 2007లో వివాహమైంది. ప్రస్తుతం అతని వయసు 44 సంవత్సరాలు కాగా, ఆమె వయసు 41 యేళ్లు. వీరికి ఓ కుమార్తె కూడా ఉంది. ఆ తర్వాత వారిమధ్య విభేదాలు తలెత్తాయి. దీంతో చీటికి మాటికి భర్తను చీదరించుకోవడం మొదలుపెట్టింది. ముఖ్యంగా, నల్లగా ఉన్నావంటూ పదేపదే తిట్టేది.
దీంతో విసుగు చెందిన ఆయన విడాకులు కోరుతూ కోర్టును ఆశ్రయించాడు. దీంతో భర్తతో పాటు అత్త మామలపై కూడా భార్య గృహ హింస చట్టం కింద కేసు పెట్టింది. తన భర్తకు వివాహేతర సంబంధాలు ఉన్నాయంటూ ఆరోపించింది. దీంతో కింది కోర్టు ఆ వ్యక్తి దాఖలు చేసుకున్న విడాకుల పిటీషన్‌ను తోసిపుచ్చడంతో ఆయన హైకోర్టును ఆశ్రయించారు.
దీనిపై విచారణ జరిపిన కోర్టు.. భర్తపై చేసిన భార్య చేసిన ఆరోపణలు పూర్తిగా నిరాధారమైనవని పేర్కొంటూ విడాకులు మంజూరు చేసింది. పైగా, నల్లగా ఉన్నాడంటూ భర్తను అవమానించడం క్రూరత్వమేనని కోర్టు పేర్కొంది.
