మెగాస్టార్‌ను ఫిదా చేసిన "ధమాకా" దర్శకుడు
మాస్ మహరాజ్ రవితేజ - శ్రీలీల జంటగా వచ్చిన చిత్రం "ధమాకా". సూపర్ డూపర్ హిట్ కొట్టింది. నక్కిన త్రినాథరావు దర్శకుడు. ఈయన ఇటీవల మెగాస్టార్ చిరంజీవికి ఓ సింగిల్ లైన్ కథను వినిపించారు. దీనికి ఫ్లాటైపోయిన చిరంజీవి.. నక్కిన దర్శకత్వంలో నటించేందుకు సమ్మతించినట్టు వార్తలు వస్తున్నాయి.
"ధమాకా" చిత్రం ఇటు యూత్, అటు మాస్ ఆడియన్స్‌ను విపరీతంగా ఆకట్టుకుంది. పైగా ఆడియన్స్ పల్స్ బాగా తెలిసిన నక్కిన త్రినాథ రావు ధైర్యం చేసి చిరంజీవికి స్టోరీ వినిపించారు. ఇది చాలా ఇంట్రెస్టింగ్‌గా ఉండటంతో మెగాస్టార్ కూడా వెంటనే అంగీకరించినట్టు సమాచారం. పైగా, ఈ చిత్రాన్ని ప్రముఖ నిర్మాణ సంస్థ డీవీవీ ఎంటర్‌టైన్మెంట్స్ బ్యానరుపై నిర్మాత డీవీవీ దానయ్య నిర్మించనున్నారు.
కాగా, ఇటీవల వాల్తేరు వీరయ్యతో ప్రేక్షకుల ముందుకు వచ్చిన చిరంజీవి ప్రస్తుతం భోళా శంకర్ చిత్రంలో నటిస్తున్నారు. మెహర్ రమేష్ దర్శకత్వం. ఆ తర్వాత ఎవరి దర్శకత్వంలో చిరంజీవి నటిస్తారన్న చర్చ సాగుతోంది. ఈ నేపథ్యంలో నక్కిన త్రినాథ రావు చెప్పిన కథకు మెగాస్టార్ ఫిదా అయిపోయి ఒప్పేసుకున్నట్టు సమాచారం.
