ఆస్కార్ వేదికపై చరిత్ర సృష్టించిన తెలుగోడి పాట - "నాటు నాటు"కు అవార్డు
తెలుగు చిత్రపరిశ్రమ ఆస్కార్ వేదికపై చరిత్ర సృష్టించింది. దర్శక ధీరుడు ఎస్ఎస్ రాజమౌళి తెరకెక్కించిన ఆర్ఆర్ఆర్ చిత్రంలోని నాటు నాటు పాట ఆస్కార్ వేదికపై మెరిసింది. బెస్ట్ ఒరిజినల్ సాంగ్ విభాగంలో ఈ పాటకు ఆస్కార్ 2023 అవార్డు వర్చింది. బెస్ట్ ఒరిజినల్ సాంగ్ విభాగంలో హాలీవుడ్ చిత్రాల్లోని పాటలతో ఈ పాట పోటీపడి అవార్డును దక్కించుకుంది.
ముఖ్యంగా, నాటు నాటు పాటకు ఆది నుంచి గట్టి పోటీ ఇచ్చిన హాలీవుడ్ చిత్రాల్లోని పాటల్లో "టెల్ ఇట్ లైక్ ఎ విమెన్" సినిమాలో 'అప్లాజ్', "బ్లాక్ పాంథర్: వకాండా ఫరెవర్" సినిమాలోని 'లిఫ్ట్ మి అప్', "ఎవ్రీథింగ్ ఎవ్రీవేర్ ఆల్ ఎట్ వన్స్" సినిమాలోని 'దిస్ ఈజ్ లైఫ్', "టాప్ గన్ మావెరిక్" సినిమాలో 'హోల్డ్ మై హ్యాండ్' పాటలను వెనక్కి నెట్టి మరీ 'నాటునాటు' పాట ఆస్కార్ దక్కించుకుంది.
'నాటునాటు' పాటకు సాహిత్యాన్ని చంద్రబోస్ అందించగా, రాహుల్ సిప్లిగంజ్, కాలభైరవ పాడారు. ప్రేమ్ రక్షిత్ కొరియోగ్రఫీ అందించారు. 'ఆర్ఆర్ఆర్' 2022 మార్చి 24వ తేదీన ప్రపంచవ్యాప్తంగా విడుదలైంది. జూనియర్ ఎన్టీఆర్, రామ్చరణ్ నటించిన ఈ సినిమా అప్పట్లో ప్రభంజనం సృష్టించింది. ఈ పాటకు వారు చేసిన డ్యాన్స్‌కు ప్రపంచం మొత్తం ఫిదా అయింది.
అదేవిధంగా తెలుగు సినిమా పాట ఆస్కార్‌కు నామినేట్ కావడం, అవార్డు దక్కించుకోవడం ఇదే తొలిసారి. దీంతో తెలుగోడు గర్వంతో తలెత్తుకుంటున్నాడు. టాలీవుడ్‌లో అప్పుడే సంబరాలు మొదలయ్యాయి. దర్శక దిగ్గజం రాజమౌళి, సంగీత దర్శకుడు కీరవాణి, పాటల రచయిత చంద్రబోస్, ఎన్టీఆర్, రామ్చరణ్, ఇతర చిత్రబృందానికి శుభాకాంక్షలు చెబుతూ సోషల్ మీడియాను హోరెత్తిస్తున్నారు.
