ప్రేమ - సంతోషం.. మీ పర్మనెంట్ అడ్రెస్ కావాలి : సునీతకు నాగబాబు విషెస్
తెలుగు చిత్రపరిశ్రమకు చెందిన సీనియర్ సింగర్ సునీత ఇటీవల రెండో పెళ్లి చేసుకుంది. యూట్యూబ్ చానెల్ అధినేత రామ్ వీరపనేని ప్రేమించి పెళ్లాడింది. ఈమెకు పెళ్లీడుకొచ్చిన ఇద్దరు పిల్లలు కూడా ఉన్నారు. ఈ క్రమంలో రామ్ వీరపనేనితో స్నేహం చేసిన సునీత.. తమ స్నేహ బంధాన్ని మరింత దృఢం చేసుకుని ముందుకు కొనసాగించేందుకు వీలుగా పెళ్లిబంధంతో ఒక్కటయ్యారు.
గత శనివారం రాత్రి కొద్ది మంది సన్నిహితుల సమక్షంలో వీరి పెళ్లి ఘనంగా జరుగగా, ఈమెకు అందరూ శుభాకాంక్షలు చెబుతున్నారు. మరికొందరు విమర్శలు కురిపిస్తున్నారు. ఈ నేపథ్యంలో మెగా బ్రదర్ నాగబాబు ట్విటర్ ద్వారా స్పందించారు.
'సంతోషం అనేది పుట్టుకతో రాదు. దాన్ని మనం అన్వేషించి అందుకోవాలి. తమ సంతోషాలను కనుగొన్నందుకు రామ్, సునీతకు అభినందనలు. ధైర్యంగా ముందడుగు వేయాలనుకునేవారికి మీ జంట ఆదర్శంగా నిలిచింది. ప్రేమ, సంతోషం అనేది ఎప్పటికీ మీ పర్మనెంట్ అడ్రెస్‌గా మారాలని కోరుకుంటున్నాను. హ్యాపీ మ్యారీడ్ లైఫ్' అంటూ నాగబాబు ట్వీట్ చేశారు.
