విలన్ పాత్ర చేయడానికి 300 సినిమాల్లో నటించాల్సివచ్చింది : సునీల్
తాను విలన్ పాత్రలను చేయడానికి ఏకంగా 300 సినిమాల్లో నటించాల్సివచ్చిందని ప్రముఖ హాస్య నటుడు, హీరో సునీల్ అన్నారు. అల్లు అర్జున్ - కె.సుకుమార్ కాంబినేషన్‌లో తెరకెక్కిన చిత్రం "పుష్ప". ఈ చిత్రం ఈ నెల 17వ తేదీన ప్రపంచ వ్యాప్తంగా రిలీజ్ కానుంది. ఈ నేపథ్యంలో చిత్రం ప్రిరిలీజ్ ఈవెంట్ హైదరాబాద్ నగరంలో ఆదివారం రాత్రి నిర్వహించారు. ఈ చిత్రంలో సునీల్ విలన్ పాత్రలో కనిపించనున్నారు.
దీనిపై సునీల్ మాట్లాడుతూ, సాధారణంగా విలన్ కావాలనుకుంటే ఆ దిశగా గట్టి ప్రయత్నాలు చేస్తే ఓ ఆరేడేళ్ళలో విలన్ అయిపోతారు. కానీ, నేను విలన్ కావడానికి ముందు కమెడియన్‌గా 300 సినిమాలు చేయాల్సివచ్చింది. హీరోగా ఓ పది సినిమాలు చేశాను. ఈ సారి మాత్రం మిమ్మల్ని కాస్త భయపెడుతాను.. మీరు కూడా భరించండి. అంతే. అని అన్నారు.
అదేసమయంలో గతంలో సునీల్ అనే కమెడియన్ లేదా హీరో చేసిన పాత్రలను గుర్తుపెట్టుకుని ఈ సినిమాను చూడొద్దు. 'పుష్ప'లో సునీల్ పాత్ర అనే కోణంలోనే ఆలోచన చేస్తూ సినిమాను చూడాలని కోరారు. ఇతర భాషల్లో నేను కనిపించడం ఇదే తొలిసారి. సో.. అక్కడ నాకు టెన్షన్ లేదు. కానీ, నా టెన్షన్ అంతా తెలుగులోనే. ఎందుకంటే ఈ సునీల్ ఇప్పటివరకు కనిపించిన సునీల్ వేరు.. 'పుష్ప' సినిమాలో కనిపించబోయే సునీల్ వేరు అని అన్నారు.
