నెమ్మదిగానే రోడ్డు దాటుతా..? మీ అవసరానికి దాటలేను.. ఎవరు? పాము..!
సాధారణంగా రోడ్డు క్రాస్ చేయాలంటే మనమంతా పరుగు పరుగున క్రాస్ చేస్తుంటాం. వృద్ధులైతే కాస్త నెమ్మదిగా క్రాస్ చేస్తారు. అదే పాము రోడ్డు దాటితే.. అవును లేట్ కాక తప్పదు కదా. ఇలాంటి ఘటనే కర్ణాటకలో చోటుచేసుకుంది. ఓ పాము నెమ్మదిగా రోడ్డు దాటుకుంది. ఇందుకు అరగంట సమయం పట్టింది. ఈ ఘటనకు సంబంధించిన వీడియో, ఫోటోలు ప్రస్తుతం నెట్టింట వైరల్ అవుతున్నాయి.
వివరాల్లోకి వెళితే.. కర్ణాటకలో ఓ పాము రోడ్డుపై రావడంతో వాహన రాకపోకలకు అంతరాయం కలిగింది. కర్ణాటకలో ఎప్పుడూ రద్దీగా వుండే ఉడుపి కల్స్కా జంక్షన్‌లో నాగుపాము ప్రత్యక్షమైంది. దీంతో షాకైన ట్రాఫిక్ పోలీసులు.. ఆ పామును ప్రజల నుంచి రక్షించారు. వాహన రాకపోకలను ఆపేశారు.
ఆ పాము రోడ్డు దాటుకుని వెళ్ళేవరకు ఓపిక పట్టారు. ఈ గ్యాప్‌లో వాహనదారులు ఆ పాము రోడ్డు దాటే దృశ్యాలను వీడియో తీశారు. సోషల్ మీడియాలో పోస్టు చేశారు. అలా నాగుపాము మండే ఎండలో రోడ్డును దాటేందుకు 30 నిమిషాలు పట్టింది. అనంతరం ఆ పామును చికిత్స కోసం ఆస్పత్రికి తరలించారు.
