గుండెపోటుతో మారడోనా మృతి.. కోలుకుంటాడనుకుంటే.. తిరిగిరాని లోకాలకు..?
అర్జెంటైనా ఫుట్‌బాల్ ఆటగాడు డిగో మారడోనా(60)గుండెపోటుతో కన్నుమూశారు. ఇటీవలే మెదడులో రక్తస్రావం జరగడంతో వైద్యులు ఆయనకు శస్త్రచికిత్స నిర్వహించారు. అనంతరం కొన్ని వారాల కిందట ఆసుపత్రి నుంచి డిశ్చార్జి అయ్యారు.
కోలుకుంటున్న దశలో అనూహ్యంగా గుండెపోటుకు గురయ్యారు. తన అపురూప విన్యాసాలతో ఫుట్ బాల్ క్రీడకే వన్నె తెచ్చిన అరుదైన క్రీడాకారుల్లో ఒకరైన మారడోనా ఆటతోనే కాదు మాదకద్రవ్యాలు, ఇతర వివాదాలతో ప్రపంచవ్యాప్తంగా గుర్తింపు పొందారు.
ఇటీవలే తన పుట్టినరోజు జరుపుకున్న ఈ ఫుట్ బాల్ లెజెండ్ ఇకలేరని తెలిసి అభిమానులు శోకసంద్రంలో మునిగిపోయారు. 1986లో అర్జెంటీనా వరల్డ్ కప్ గెలవడంలో మారడోనాదే కీలకపాత్ర. ఇంగ్లాండ్‌తో కీలక మ్యాచ్‌లో హ్యాండ్ ఆఫ్ గాడ్ గోల్‌తో మారడోనా సృష్టించిన సంచలనం అంతా ఇంతా కాదు.
గోల్ పోస్ట్ వద్ద మెరుపువేగంతో దూసుకెళ్లి, బంతిని గోల్ పోస్ట్ లోకి పంపినా, అది చేయి తగిలి గోల్ లోకి వచ్చిందని ప్రత్యర్థులు ఆరోపించగా, అది దేవుడి చేయి అయ్యుంటుందంటూ నాడు మారడోనా అందరినీ విస్మయానికి గురిచేశాడు.
