బౌలర్లకు నేనంటే భయం.. అయినా ఒప్పుకోరు.. క్రిస్ గేల్
వెస్టిండీస్ క్రికెట్ దిగ్గజం క్రిస్ గేల్ అంటే బౌలర్లకు హడల్ అని తానే స్వయంగా చెప్పుకున్నాడు. అయితే ఇదే విషయాన్ని బౌలర్లు కెమెరా ముందు చెప్పలేకపోతున్నారని అంటున్నాడు. ఈ నెల చివర్లో ప్రారంభం కానున్న వరల్డ్‌కప్ 2019లో గేల్ వెస్టిండీస్ జట్టు వైస్ కెప్టెన్‌గా బరిలోకి దిగుతున్నాడు. ఈ సందర్భంగా తన బలాబలాల గురించి ఈ విధంగా చెప్పుకొచ్చాడు.
క్రికెట్‌లో అత్యంత ప్రమాదకర బ్యాట్స్‌మన్ క్రిస్ గేల్ అని అందరూ అనుకుంటారు. అయితే బౌలర్లను ఈ విషయం అడిగితే మాత్రం కెమెరాల ముందు లేదు అని వారు సమాధానమిస్తారు. అదే కెమెరా వెనుక ప్రశ్నిస్తే మాత్రం ఖచ్చితంగా నిజమే అని చెప్తారు. వాళ్లు నిజం చెప్పలేకపోతున్నారని గేల్ వెల్లడించాడు.
తాను అభిమానుల ముందు అంతా నిజమే చెప్తున్నానని, ఇది గేమ్‌పై తనకు ఉన్న ప్రేమని చెబుతూనే ఏదో ఒక సమయంలో క్రికెట్ వదిలి వెళ్లాల్సి ఉంటుంది, కాబట్టి ఎంజాయ్ చేస్తున్నంత కాలం ఆటను వదలాల్సిన అవసరం లేదని, అభిమానులు ఎప్పుడూ తన నుండి సిక్సులు మాత్రమే కోరుకుంటారు.
అలాగే వారి అభిమానమే తనను అంచనాలకు మించి ఆడేలా ప్రేరేపిస్తాయంటూనే తాను ఇప్పుడు నిరూపించుకోవడానికి ఇంకా ఏమీ మిగిలి లేదు అని చెప్తూ, కేవలం వరల్డ్‌కప్‌ను గెలుచుకోవడం తప్ప అని క్రిస్ గేల్ ముగించాడు.
