బీహర్ యువతకు శుభవార్త చెప్పిన సీఎం నితీశ్

బీహార్ రాష్ట్ర యువతకు ఆ రాష్ట్ర ముఖ్యమంత్రి నితీశ్ కుమార్ శుభవార్త చెప్పారు. త్వరలోనే 10 లక్షల ఉద్యోగాలను భర్తీ చేయనున్నట్టు ప్రకటించారు. 

ఇటీవల బీహార్ రాష్ట్రంలో రాజకీయాలు ఒక్కసారిగా మారిపోయిన విషయం తెల్సిందే. ఈ క్రమంలో బీజేపీతో తెగదెంపులు చేసుకున్న నితీశ్ కుమార్ తన ప్రత్యర్థి ఆర్జేడీతో కలిసి ప్రభుత్వాన్ని ఏర్పాటుచేసింది. 

అయితే, తాము అధికారంలోకి వస్తే 10 లక్షల ఉద్యోగాలు కల్పిస్తామని గత ఎన్నికల్లో ఆర్జేడీ నేత తేజస్వి యాదవ్ హామీ ఇచ్చారు. ఇపుడు ప్రభుత్వంలో ఉపముఖ్యమంత్రిగా బాధ్యతలు చేపట్టిన తరుణంలో సీఎం నితీష్ కుమార్ ఈ హామీని నెరవేర్చే దిశగా అడుగులు వేస్తున్నారు. 

స్వాతంత్ర్య దినోత్సవం సందర్భంగా జాతీయ జెండాను ఎగురవేసిన నితీశ్... తమ సంకీర్ణ ప్రభుత్వ ఆకాంక్ష మేరకు 10 లక్షల ప్రభుత్వ ఉద్యోగాలతో పాటు మరో 10 లక్షల మందికి ఉపాధి అవకాశాలను కల్పిస్తామని చెప్పారు. ఉద్యోగాల కల్పన కోసం తాము పెద్ద ఎత్తున కృషి చేస్తామని తెలిపారు. 

కాగా, స్వాతంత్ర్యం దినోత్సవం రోజున సీఎం చేసిన ప్రకటనపై తేజస్వీ యాదవ్ సంతోషం వ్యక్తం చేశారు. ముఖ్యమంత్రి అతిపెద్ద ప్రకటన చేశారంటూ వ్యాఖ్యానించారు. సీఎం హామీని నెరవేర్చేందుకు రెండు పార్టీలు కలిసికట్టుగా పని చేస్తాయని తెలిపారు.