ముప్పు తప్పించుకున్న ప్రజ్ఞాన్ రోవర్ - ఫోటోలు విడుదల చేసిన ఇస్రో
చంద్రుడి దక్షిణ ధృవం ఉపరితలంపై పరిశోధనలు చేస్తున్న ప్రజ్ఞాన్ రోవర్ తృటిలో ముప్పు తప్పించుకుంది. తాను ప్రయాణిస్తున్న మార్గంలో ఉన్న పెద్ద గోతిలో పడే ప్రమాదం నుంచి తప్పింది. ఇస్రో శాస్త్రవేత్తల సూచనలతో ప్రజ్ఞాన్ రోవర్ తన దారి మార్చుకుంది. ఈ గోతితో పాటు ప్రజ్ఞాన్ రోవర్ దారి మళ్లిన దానికి సంబంధించిన ఫోటోలను ఇస్రో రిలీజ్ చేసింది. చంద్రమండలంలో 4 మీటర్ల లోతైన గొయ్యిని గుర్తించిన రోవర్‌ను అప్రమత్తం చేసిన ఇస్రో.. గొయ్యికి మూడు మీటర్ల ఇవతలి నుంచే రూటు మార్చుకుని సురక్షిత మార్గంలో ముందుకుసాగింది.
ఈ ప్రజ్ఞాన్ రోవర్‌కు అమర్చిన సెన్సార్ కెమెరాలు ఈ గొయ్యిని గుర్తించాయి ఇస్రోను అలెర్ట్ చేశాయి. దీంతో గొయ్యి మరో 3 మీటర్ల దూరంలో ఉందనగా ఇస్రో గ్రౌండ్ కంట్రోల్ స్టేషన్ నుంచి రోవర్‌కు సంకేతాలు పంపింది. ఆ వెంటనే రోవర్ తన దారి మార్చుకుని సురక్షిత మార్గంలో ప్రయాణించింది. ఈ ఘటన సోమవారం జరిగింది. ఈ మేరకు రోవర్ గమనానికి సంబంధించిన రెండు ఫోటోలను ఇస్రో మీడియాకు రిలీజ్ చేసింది. అందులో ఒకటి గొయ్యి ఉన్న ప్రాంతం కాగా, మరొకటి రోవర్ వెళుతున్న కొత్త దారిని చూడొచ్చు.
