రోజుకోసారైనా భార్యాభర్తలు ఫోనులో మాట్లాడుతున్నారా?
భార్యాభర్తలిద్దరూ ఉద్యోగం చేస్తున్నారా? రోజుకోసారైనా ఫోనులో మాట్లాడుతున్నారా? లేదా భార్యాభర్తలు దూరంగా ఉన్నవేళ కనీసం బాగున్నావా? అని మొబైల్ సందేశమైనా ఇస్తున్నారా? ఇవేవీ చేయకపోతే.. మీ వివాహ బంధానికి బ్రేక్ పడే సమయం దగ్గర్లో ఉందని భావించాల్సిందేనని మానసిక నిపుణులు అంటున్నారు.
అలాగే వైవాహిక బంధానికి నిలిపివుంచే లైంగిక సంబంధం విషయంలో అంటీముట్టనట్లుంటే కూడా భార్యాభర్తల సంబంధానికి బ్రేక్‌లు పడే అవకాశాలు లేకపోలేదని వారంటున్నారు. అలాగే రోజువారీ పనులతో యాంత్రికంగా మారిపోవడం.. జీవిత భాగస్వామి పట్ల పెద్దగా ఆసక్తి చూపకపోవడం.. ఆఫీసు పనులతో బిజీ అయిపోవడం వంటివి జరుగుతుంటే కాస్త అప్రమత్తంగా ఉండాలని మానసిక నిపుణులు సూచిస్తున్నారు.
ఆధునికత పేరుతో భాగస్వాముల మధ్య సులభంగా పొరపొచ్ఛాలు వచ్చేస్తున్నాయని తద్వారా విడాకుల సంఖ్య పెరిగిపోతున్నాయి. వీటిని పరిష్కరించుకోవాలంటే... భార్యాభర్తలు చిన్న చిన్న విషయాలకు గొడవపడటాన్ని నిలపాలి. చర్చలతో సమస్యలను పరిష్కరించుకోవాలి. పురుషులైతే బావమరిదిని, మహిళలైతే ఆడపడుచును తిట్టిపోయడం వంటివి పక్కనబెట్టాలి.
ఒకరిని ఒకరు పట్టించుకోకుండా ఉండకూడదు. ఎక్కడికెళ్లినా.. భాగస్వామితో ఫోన్‌లోనైనా టచ్‌లో ఉండాలి. ఆఫీసుకు వెళ్తే కనీసం ఒక్కసారైనా ఫోనులో మాట్లాడి బాగోగులు అడిగి తెలుసుకోండి. భార్యాభర్తలిద్దరూ కలిసి నిర్ణయాలు తీసుకోవడం మంచిది.
