హీరో విజయ్‌కు రూ.1.50 కోట్ల అపరాధం.. మద్రాస్ హైకోర్టుకు నివేదిక
తమిళ అగ్రహీరో విజయ్‌కు ఆదాయన్ను శాఖ రూ.1.50 కోట్ల అపరాధం విధించింది. దీన్ని రద్దు చేయాలని కోరుతూ ఆయన మద్రాస్ హైకోర్టులో పిటిషన్ దాఖలు చేశారు. ప్రస్తుతం ఈ వ్యవహారానికి సంబంధించిన నివేదిక హైకోర్టుకు చేరింది. ఈ వివరాలను పరిశీలిస్తే, హీరో విజయ్ గత 2015-16 ఆర్థిక సంవత్సరానికిగాను ఆదాయ పన్ను రిటర్న్స్‌ను దాఖలు చేశారు. ఆ యేడాది ఆయన మొత్తం రూ.35,42,91,890 పొందినట్టు పేర్కొన్నారు. దీనిపై మదింపు చేపట్టిన ఆదాయపన్ను శాఖ గత 2015 సెప్టెంబరు 30వ తేదీన హీరో నివాసంలో ఐటీ అధికారులు తనిఖీలు చేశారు.
ఈ తనిఖీల్లో "పులి" చిత్రానికి తీసుకున్న రూ.15 కోట్ల రెమ్యునరేషన్‌ను ఆయన ఆదాయ పన్ను పత్రాల్లో చూపించలేదని తేలింది. దీంతో రూ.1.50 కోట్ల అపరాధాన్ని కోట్ల అపరాధం విధించింది. దీన్ని రద్దు చేయాలని కోరుతూ విజయ్ మద్రాస్ హైకోర్టును ఆశ్రయించారు.
ఈ పిటిషన్ విచారించిన హైకోర్టు.. ఆదాయపన్నుశాఖ ఉత్తర్వులకు మధ్యంతర నిషేధం విధిస్తూ, పిటిషన్‌పై ఆదాయపన్ను శాఖ జవాబు ఇవ్వాలని ఉత్తర్వులు ఇచ్చింది. ఈ పిటిషన్ మంగళవారం మరోమారు విచారణకు వచ్చింది. విజయ్‌కు రూ.1.50 కోట్లు జరిమానా ఎందుకు విధించారనే విషయమై నివేదిక దాఖలు చేయగా కేసు విచారణను ఈ నెల 30వ తేదీకి హైకోర్టు వాయిదా వేసింది.
